ശ്രീലങ്കയില് പ്രക്ഷോഭം തുടരുന്നതിനിടെ രാജ്യം വിടാന് വിമാനത്താവളത്തിലെത്തിയ ശ്രീലങ്കന് പ്രസിഡന്റ് ഗോതബായ രജപക്സെയുടെ സഹോദരന് ബേസില് രജപക്സെ നിരാശനായി മടങ്ങി. എയര്പോര്ട്ട് അധികൃതര് തടഞ്ഞതോടെയാണ് അദ്ദേഹത്തിന് മടങ്ങേണ്ടി വന്നത്.
ഇന്ന് പുലര്ച്ചെയാണ് കൊളംബോ വിമാനത്താവളത്തിലെ വിഐപി ടെര്മിനല് വഴി രാജ്യം വിടാന് രജപക്സെ ശ്രമം നടത്തിയത്. മുന്മന്ത്രി കൂടിയായ അദ്ദേഹത്തെ ജനങ്ങള് തിരിച്ചറിഞ്ഞതോടെ രാജ്യം വിടുന്നത് തടഞ്ഞു. ഇമ്മിഗ്രഷന് നടപടികള് പൂര്ത്തിയാക്കാന് ഉദ്യോഗസ്ഥര് വിസ്സമ്മതിച്ചതിനെ തുടര്ന്ന് രജപക്സെ തിരികെ പോയി.
അതേസമയം ബേസില് രജപക്സെയ്ക്ക് ഇന്ത്യ സുരക്ഷയൊരുക്കിയെന്ന വാര്ത്തകള് ഇന്ത്യന് സര്ക്കാര് നിഷേധിച്ചു. നാളെ രാജി വയ്ക്കാനിരിക്കുന്ന ശ്രീലങ്കന് പ്രസിഡന്റ് ഇന്ത്യയിലേക്ക് കടന്നെന്ന വാര്ത്തയും സര്ക്കാര് വൃത്തങ്ങള് നിഷേധിച്ചു.
ഭക്ഷ്യപ്രതിസന്ധിയും ഇന്ധനപ്രതിസന്ധിയും രൂക്ഷമായതോടെയാണ് ശ്രീലങ്കയില് ജനങ്ങള് പ്രതിഷേധവുമായി തെരുവിലിറങ്ങിയത്. പ്രസിഡന്റിന്റെയും പ്രധാനമന്ത്രിയുടെയും വസതികള് ഉള്പ്പെടെ പ്രക്ഷോഭകര് പിടിച്ചെടുത്തു.