വാഷിംഗ്ഡണ് ഡിസി: മുന് ബിജെപി നേതാക്കളുടെ നബി വിരുദ്ധ പ്രസ്താവനയെ അപലപിച്ച് അമേരിക്ക. നേതാക്കളുടെ പ്രസ്താവനയെ അപലപിക്കുന്നെന്നും , ബിജെപി ഇതിനെതിരെ പരസ്യമായി രംഗത്തുവന്നതില് സന്തോഷമുണ്ടെന്നും സര്ക്കാര് വക്താവ് നെഡ് പ്രൈസ് മാധ്യമങ്ങളോട് പറഞ്ഞു.
ഇന്ത്യയുമായുള്ള ഉന്നതലയോഗങ്ങളില് മതസ്വാതന്ത്ര്യം ഉള്പ്പെടെയുള്ള കാര്യങ്ങള് ചര്ച്ചയാകാറുണ്ട്. മനുഷ്യാവാകാശങ്ങള് സംരക്ഷിക്കുന്നതുള്പ്പെടെയുള്ള കാര്യങ്ങളില് യുഎസ് ഇന്ത്യയെ പിന്തുണയ്ക്കാറുണ്ടെന്നും അദ്ദേഹം പറഞ്ഞു.
കഴിഞ്ഞ മേയ് 26നാണ് ചാനല് ചര്ച്ചയില് പങ്കെടുത്ത ബിജെപി വക്താവ് നൂപൂര് ശര്മയും, പാര്ട്ടി നേതാവ് നവീന് ജിന്ഡാലും നബി വിരുദ്ധ പ്രസ്താവന നടത്തിയത്. പരാമര്ശത്തിനെതിരെ വിവിധ രാജ്യങ്ങള് നേരത്തെ പ്രതിഷേധം രേഖപ്പെടുത്തിയിരുന്നു.
സംഭവത്തില് കേന്ദ്രസര്ക്കാര് മാപ്പ് പറയണമെന്നുള്പ്പെടെ ആവശ്യം ഉയര്ന്നിരുന്നു. അന്തര്ദേശീയ തലത്തില് ഉള്പ്പെടെ പ്രതിഷേധം ഉയര്ന്നതോടെ ബിജെപി ഇവരെ സസ്പെന്ഡ് ചെയ്തിരുന്നു.