സിംബാബ്വേയില് യുവാക്കള്ക്കിടയില് മദ്യത്തിന്റെയും, മയക്കുമരുന്നിന്റെയും ഉപയോഗം ദിനം പ്രതി വർധിച്ചുവരികയാണ്. ഉപയോഗിച്ച സാനിട്ടറി പാഡില് നിന്നും ലഹരി നുണയാന് കൗമാരക്കാരുടെ സംഘം. ലഹരിയ്ക്കായി എന്തും ചെയ്യാന് മടിയില്ലാത്ത കൗമാരക്കാര്ക്കിടയില് ആര്ത്തവസമയത്ത് ഉപയോഗിച്ച് വലിച്ചെറിഞ്ഞ സാനിട്ടറി നാപ്കിനും ട്രെന്ഡ് ആയി മാറിയത് എല്ലാവരെയും ഞെട്ടിച്ചിരിക്കുകയാണ് രാജ്യം സാമ്പത്തികമായി വെല്ലുവിളി നേരിടുന്ന അവസരത്തിൽ വിലകുറഞ്ഞ മദ്യത്തെയും , ലഹരി പദാർത്ഥങ്ങളെയും ആശ്രയിക്കാൻ യുവാക്കൾ നിർബന്ധിതരാകുന്നു.
നിയമവിരുദ്ധമാണെങ്കിലും, അവിടെയുള്ള യുവാക്കള് അത്തരത്തില് സാധാരണമായി ഉപയോഗിക്കുന്ന ഒരു ലഹരി പാനീയമാണ് ബ്രോങ്ക്ലിയര്. മദ്യവും കഞ്ചാവും കഫ് സിറപ്പും ചേര്ത്ത് നിര്മിക്കുന്ന ചിലവ് കുറഞ്ഞ, എളുപ്പത്തില് ലഭ്യമായ ഒരു പാനീയമാണ് അത്. എന്നാല് കോവിഡ് മഹാമാരിയെ തുടര്ന്ന് അതിര്ത്തികള് അടച്ചു പൂട്ടിയപ്പോള് വിപണിയില് എത്തുന്ന മരുന്നുകളുടെ ഒഴുക്ക് കുറഞ്ഞു. ഇതോടെ കരിഞ്ചന്തയില് ബ്രോങ്ക്ലിയറിന്റെ ലഭ്യത കുറഞ്ഞു.
സ്വാഭാവികമായും ചിലവ് കുറഞ്ഞ മറ്റ് മാര്ഗ്ഗങ്ങള് തിരയാന് യുവാക്കള് നിര്ബന്ധിതരായി. ഒടുവില് അവര് കണ്ടെത്തിയത് വിചിത്രമായ ഒരു മാര്ഗമാണ്. ഉപയോഗിച്ച് വലിച്ചെറിഞ്ഞ സാനിറ്ററി പാഡുകളില് നിന്നും, ബേബി ഡയപ്പറുകളില് നിന്നും ഒരു ദ്രാവകം വേര്തിരിച്ചെടുത്ത് മയക്ക് മരുന്നിന് പകരമായി ഉപയോഗിക്കാന് ആരംഭിച്ചിരിക്കയാണ് അവര്. ഇതുണ്ടാക്കുന്ന ആരോഗ്യപ്രശ്നങ്ങള് വളരെ വലുതാണ്.
ഇതിനായി അവര് ഡയപ്പറുകളിലും, പാഡുകളിലും കാണപ്പെടുന്ന വെളുത്ത തരികള് ശേഖരിച്ച് വെള്ളം ചേര്ത്ത് തിളപ്പിക്കുന്നു. തിളച്ചു കഴിയുമ്പോള്, അത് ചാരനിറത്തിലുള്ള ഒരു പദാര്ത്ഥമായി മാറുന്നു. അസഹ്യമായ മണവും രുചിയുമുള്ള ഈ മിശ്രിതം യുവാക്കള് മറ്റ് ലഹരി പദാര്ത്ഥങ്ങളില് കലര്ത്തി കുടിക്കുന്നു.
സിംബാബ്വേയിലെ യുവാക്കള് ഇങ്ങനെ ഉയര്ന്ന അളവില് ലഹരിയ്ക്ക് അടിമകളായി തീരുന്നതിന്റെ പിന്നില് നിരവധി കാരണങ്ങള് പറയുന്നുണ്ട്. അതിലൊന്ന് തൊഴിലില്ലായ്മയാണ്. 2018 ഒക്ടോബര് മുതല് രാജ്യം കടുത്ത സാമ്പത്തിക തകര്ച്ചയിലാണ്. കറന്സി മൂല്യം ഇടിഞ്ഞത്തോടെ ഉയര്ന്ന പണപ്പെരുപ്പവും, തൊഴിലില്ലായ്മയും രാജ്യത്തെ ഉലച്ചു.