വാഷിംഗ്ടൺ ഡിസി: യുഎസ് മുൻ പ്രസിഡന്‍റ് ബരാക് ഒബാമയ്ക്ക് കോവിഡ് പോസിറ്റീവ് സ്ഥിരീകരിച്ചു. ട്വിറ്ററിലൂടെ ഒബാമ തന്നെയാണ് താൻ പോസിറ്റീവായ വിവരം അറിയിച്ചത്. കുറച്ച് ദിവസമായി തൊണ്ട വേദനയുണ്ടെന്നും മറ്റു ആരോഗ്യപ്രശ്നങ്ങളൊന്നുമില്ലെന്നും അദ്ദേഹം ട്വീറ്റ് ചെയ്തു.
ഭാര്യ മിഷേൽ ഒബാമയുടെ പരിശോധനാ ഫലം നെഗറ്റീവാണെന്നും ഒബാമ അറിയിച്ചു. താനും മിഷേലും വാക്സിനും ബൂസ്റ്റർ ഡോസും എടുത്തിരുന്നു. ഇതു വരെ വാക്സിൻ കുത്തിവയ്പ് എടുക്കാത്തവർ വേഗം വാക്സിൻ സ്വീകരിക്കണമെന്നും ഒബാമ ട്വീറ്റിൽ ഓർമിപ്പിച്ചു.
അതേസമയം, യുഎസിലെ പ്രതിദിന കോവിഡ് കേസുകളുടെ എണ്ണം കുത്തനെ കുറയുകയാണ്. മാർച്ച് പകുതി എത്തുമ്പോൾ പ്രതിദിനം ശരാശരി 35,000 കേസുകളാണ് റിപ്പോർട്ട് ചെയ്യുന്നത്. ജനുവരി പകുതിയിൽ ശരാശരി 810,000 കേസുകൾ റിപ്പോർട്ട് ചെയ്തിരുന്നു
