മുംബൈ: ഐപിഎൽ ട്വന്റി 20 ക്രിക്കറ്റിന്റെ 15-ാം പതിപ്പിലെ ഉദ്ഘാടന മത്സരത്തിൽ കോൽക്കത്ത നൈറ്റ് റൈഡേഴ്സിനു ജയം. നിലവിലെ ചാന്പ്യൻമാരായ ചെന്നൈ സൂപ്പർ കിംഗ്സിനെ ആറ് വിക്കറ്റിനാണ് കോൽക്കത്ത വീഴ്ത്തിയത്.
ചെന്നൈ ഉയർത്തിയ 132 റൺസ് വിജയലക്ഷ്യം കോൽക്കത്ത 18.3 ഓവറിൽ നാല് വിക്കറ്റ് നഷ്ടത്തിൽ മറികടന്നു. കോൽക്കത്തയ്ക്കായി ഓപ്പറണറുമാരായ അജിങ്ക്യ രഹാനയും വെങ്കിടേഷ് അയ്യരും മികച്ച തുടക്കമാണ് നൽകിയത്. ഇരുവരും ചേർന്ന് 43 റൺസിന്റെ കൂട്ടുകെട്ട് പടുത്തുയർത്തു.
വെങ്കിടേഷ് അയ്യർ (16), അജിങ്ക്യ രഹാനെ (44), സാം ബില്ലിംഗ്സ് (25), നിതീഷ് റാണ (21), ശ്രേയസ് അയ്യർ (20 നോട്ടൗട്ട്), എന്നിവരുടെ പ്രകടനമാണ് അനായാസ ജയമൊരുക്കിയത്.
ടോസ് നേടിയ കോൽക്കത്ത നായകൻ ശ്രേയസ് അയ്യർ ചെന്നൈയെ ബാറ്റിംഗിനു വിടുകയായിരുന്നു. പുറത്താകാതെ 50 റണ്സ് നേടിയ മഹേന്ദ്ര സിംഗ് ധോണിയുടെ മികവിലാണ് ചെന്നൈ 131 റണ്സിലെത്തിയത്. റോബിൻ ഉത്തപ്പ (28), രവീന്ദ്ര ജഡേജ (26 നോട്ടൗട്ട്) ഭേദപ്പെട്ട ബാറ്റിംഗ് കാഴ്ചവച്ചു.