ചറ്റോഗ്രാം: ലോക ടെസ്റ്റ് ചാമ്പ്യൻഷിപ്പ് പോയിന്റ് പട്ടികയിൽ മുന്നേറാനുള്ള ഇന്ത്യൻ ശ്രമങ്ങൾക്ക് കരുത്ത് പകർന്ന് ബംഗ്ലാദേശ് പരമ്പരയിലെ ആദ്യ മത്സരം. വിജയലക്ഷ്യമായ 513 റൺസ് പിന്തുടരുന്ന ബംഗ്ലാദേശ് നാലാം ദിനം കളി അവസാനിക്കുമ്പോൾ 272-6 എന്ന നിലയിലാണ്.
മത്സരം അവസാനിക്കാൻ ഒരു ദിവസം ബാക്കി നിൽക്കെ നാല് വിക്കറ്റ് കൈവശമുള്ള ബംഗ്ലാദേശിന് ജയം സ്വന്തമാക്കാൻ 241 റൺസ് കൂടി നേടേണ്ടതുണ്ട്. പുതുമുഖ താരം സാക്കിർ ഹുസൈൻ സെഞ്ചുറി നേടിയെങ്കിലും റൺമല താണ്ടാൻ ബംഗ്ലാ ബാറ്റർമാർ വിഷമിക്കുകയാണ്.
വിക്കറ്റ് നഷ്ടമില്ലാതെ 42 റൺസ് നേടി മൂന്നാം ദിവസം കളി അവസാനിപ്പിച്ച ബംഗ്ലാദേശിന് മികച്ച തുടക്കമാണ് ലഭിച്ചത്. ഓപ്പണിംഗ് കൂട്ടുകെട്ടിൽ 124 റൺസ് നേടിയ നജ്മുൽ ഷാന്റോ(67) – സാക്കിർ ഹുസൈൻ(100) സഖ്യം ബംഗ്ലാ ഇന്നിംഗ്സിനെ കരയ്ക്കടുപ്പിക്കുമെന്ന് തോന്നിപ്പിച്ചു. എന്നാൽ മൂന്ന് വിക്കറ്റ് നേടിയ അക്സർ പട്ടേൽ ബംഗ്ലാ ബാറ്റിംഗ് നിരയുടെ നട്ടെല്ലൊടിച്ചു.
നായകൻ ഷാക്കിബ് അൽ ഹസൻ 40 റൺസുമായി ക്രീസിലുണ്ടെങ്കിലും വാലറ്റത്തിന് ബാറ്റിംഗ് കരുത്തില്ലാത്തതിനാൽ ബംഗ്ലാദേശിന്റെ വിജയപ്രതീക്ഷകൾ അവസാനിച്ച മട്ടാണ്. ഒന്പത് റൺസ് നേടിയ മെഹ്ദി ഹസൻ ആണ് ഷാക്കിബിനൊപ്പം ക്രീസിൽ.
അക്സറിന് മികച്ച പിന്തുണ നൽകിയ ഉമേഷ് യാദവ്, ആർ. അശ്വിൻ, കുൽദീപ് യാദവ് എന്നിവർ ഓരോ വിക്കറ്റ് വീതം നേടി.