യുഎസ് ഓപ്പണ് ടെന്നീസിലെ ഏറ്റവും ഉയർന്ന പിഴശിക്ഷ ഓസ്ട്രേലിയൻ പുരുഷ സിംഗിൾസ് താരം നിക് കിർഗ്യോസിന്. കാണികളുമായി അസ്വാരസ്യത്തിലാകുകയും അവരെ അപമാനിക്കുന്ന തരത്തിൽ കോർട്ടിൽ തുപ്പുകയും ചെയ്തതിനാണ് പിഴശിക്ഷ. 8.76 ലക്ഷം രൂപയാണ് താരം പിഴയായി ഒടുക്കേണ്ടത്.
പുരുഷ ഡബിൾസിൽ കിർഗ്യോസ് – തനാസി കൊക്കനാകിസ് സഖ്യം ആദ്യ റൗണ്ട് ജയം നേടിയതിനു പിന്നാലെയാണ് പിഴശിക്ഷ പ്രഖ്യാപിക്കപ്പെട്ടത്. പുരുഷ ഡബിൾസിൽ ആദ്യ റൗണ്ടിൽ ഫ്രാൻസിന്റെ ഗാസ്റ്റണ് – ഇറ്റലിയുടെ മ്യൂസെറ്റി സഖ്യത്തെ 4-6, 6-3, 6-4നായിരുന്നു ഓസീസ് കൂട്ടുകെട്ട് ആദ്യ റൗണ്ടിൽ കീഴടക്കിയത്.
പുരുഷ സിംഗിൾസ് രണ്ടാം റൗണ്ടിൽ ഫ്രാൻസിന്റെ ബെന്യാമിൻ ബോൻസിക്കെതിരേ ജയം നേടിയ മത്സരത്തിലായിരുന്നു കിർഗ്യോസ് കോർട്ടിൽ തുപ്പിയത്. മത്സരത്തിനിടെ ഗാലറിയിൽനിന്ന് കഞ്ചാവിന്റെ മണം വരുന്നെന്ന ആരോപണവും സ്ഥിരം വിവാദനായകനായ കിർഗ്യോസ് നടത്തിയിരുന്നു.