എടപ്പാൾ: ടെറസിനുമുകളിലായിരുന്ന അനിയൻ കൺമുന്നിലതാ, കാൽവഴുതി താഴേയ്ക്ക് വീഴുന്നു. താഴെനിന്ന ഏട്ടനുമുന്നിൽ പാഴാക്കാനില്ല സമയം. ഒരുനിമിഷം, അയാൾ കുതിച്ചു, അനിയന് രക്ഷാ കരങ്ങളുമായി. നീട്ടിപ്പിടിച്ച ഏട്ടന്റെ കൈകളിൽ അനിയനു പുനർജന്മം.
ടെറസിൽനിന്ന് കാൽവഴുതി താഴേക്കുവീണ യുവാവിനാണ് ജ്യേഷ്ഠന്റെ കൈകൾ രക്ഷയായത്. ചങ്ങരംകുളം ഒതളൂർ കുറുപ്പത്ത് വീട്ടിൽ ഷഫീഖിനെയാണ് താഴെനിന്ന സഹോദരൻ സാദിഖ് കൈകളിൽ കോരിയെടുത്തു രക്ഷിച്ചത്.
വീട് വൃത്തിയാക്കാനായി കയറിയതായിരുന്നു ഇദ്ദേഹം. മുകളിലെ ജോലിക്കിടയിൽ കാൽവഴുതി താഴേക്കുവീണു. ഇതേസമയം മുറ്റത്തുനിന്ന് ടെറസിലേക്ക് പൈപ്പിലൂടെ വെള്ളമെത്തിച്ചു നൽകുകയായിരുന്നു സഹോദരൻ സാദിഖ്. ഷഫീഖ് വീഴുന്നത് ഇദ്ദേഹം കണ്ടു. ഉടൻതന്നെ പൈപ്പ് വലിച്ചെറിഞ്ഞ്, ഓടിയെത്തി, താഴേക്കുവന്ന ഷഫീഖിനെ രണ്ടു കൈകളിലുംകൂടി താങ്ങിയെടുത്തു. ഇരുവരും മുറ്റത്ത് വീണു.
