ന്യൂഡല്‍ഹി: കേന്ദ്രമന്ത്രി സ്മൃതി ഇറാനിയുടെ മകള്‍ സോയിഷ് ഇറാനിക്കെതിരെ എക്‌സൈസ് വകുപ്പിന് പരാതി. മരിച്ച ആളുടെ പേരില്‍ ബാര്‍ ലൈസന്‍സ് സ്വന്തമാക്കിയെന്നാണ് പരാതി. സോയിഷ് ഇറാനിയുടെ ഉടമസ്ഥതയിലുള്ള സില്ലി സോള്‍സ് കഫേ ആന്‍ഡ് ബാറിനെതിരെ എക്‌സൈസ് വകുപ്പ് നോട്ടീസയച്ചു.
ആന്‍റണി റോഡ്രിഗറസ് എന്ന വിവാരാവകാശ പ്രവര്‍ത്തകനാണ് പരാതി നല്‍കിയത്. മുംബൈ സ്വദേശി ആന്‍റണി ഗാമയുടെ പേരിലാണ് വടക്കന്‍ ഗോവയില്‍ പ്രവര്‍ത്തിക്കുന്ന ബാറിന്‍റെ ലൈസന്‍സ് കഴിഞ്ഞ ജൂണില്‍ പുതുക്കി നല്‍കിയത്. എന്നാല്‍ 2021 മേയില്‍ ഗാമ മരിച്ചെന്നു പരാതിയില്‍ പറയുന്നു.
2021 ഫെബ്രൂവരിയിലാണ് സോയിഷ് ഇറാനി സ്ഥാപനത്തിന്‍റെ ലൈസന്‍സ് സ്വന്തമാക്കിയത്. ഗോവയിലെ നിയമപ്രകാരം റസ്റ്റോറന്‍റായി മാറാതെ ലൈസന്‍സ് ലഭിക്കില്ലെന്നു പരാതിയില്‍ ചൂണ്ടിക്കാട്ടി. അന്ന് കഫേ മാത്രമായിരുന്ന സ്ഥാപനത്തിന്‍റെ പേരില്‍ സോയിഷ് ഇറാനി അനധികൃതമായി ലൈസന്‍സ് സമ്പാദിച്ചെന്നും പരാതിയില്‍ പറയുന്നു.
