പനാജി: ഐഎസ്എൽ ഫുട്ബോൾ സെമിയിൽ എടികെ മോഹൻ ബഗാനെ തകർത്ത് ഹൈദരാബാദ് എഫ്സി ഫൈനലിൽ. ഇതോടെ പുതിയ ചാന്പ്യൻമാരുടെ ഉദയത്തനാണ് ഗോവ കാത്തിരിക്കുന്നത്.
ഞായറാഴ്ച നടക്കുന്ന കലാശപ്പോരിൽ ഹൈദരാബാദ് എഫ്സി കേരള ബ്ലാസ്റ്റേഴ്സിനെ നേരിടും. രണ്ട് തവണ ഫൈനലിൽ എത്തിയെങ്കിലും കേരളത്തിന്‍റെ കിരീട മോഹം ബാക്കിയാണ്. ഹൈദരാബാദിന്‍റെ ആദ്യ ഫൈനലാണിത്. ഇതോടെ ഫറ്റോർഡയിൽ പുതിയ ചാന്പ്യൻമാർ പിറക്കും.
ഇന്ന് ഹൈദരാബാദിനെ എതിരില്ലാത്ത ഒരു ഗോളിന് തോൽപ്പിച്ചെങ്കിലും ഫൈനൽ എത്തിപ്പിടിക്കാൻ എടികെയ്ക്ക് ആയില്ല. ആദ്യപാദത്തിലെ 3-1 ജയത്തിന്‍റെ ബലത്തിൽ ഇരുപാദങ്ങളിലുമായി 3-2ന്‍റെ ജയത്തോടെ ഹൈദരാബാദ് ഫൈനലിന് ടിക്കറ്റെടുത്തു.
എടികെയെ ഇന്ന് നിർഭാഗ്യം പിന്തുടരുകയായിരുന്നു. നിരവധി അവസങ്ങൾ ലഭിച്ചിട്ടും ഹൈദരാബാദിന്‍റെ പ്രതിരോധ കോട്ട തകർക്കാൻ എടികെയ്ക്കായില്ല.
റോയ് കൃഷ്ണയാണ് എടികെയ്ക്കായി ഗോൾ നേടിയത്. 79-ാം മിനിറ്റിലാണ് റോയ് കൃഷ്ണയ്ക്ക് ഹൈദരാബാദിന്‍റെ പ്രതിരോധ കോട്ടയിൽ ചെറിയൊരു വിള്ളൽ വീഴ്ത്താൻ ആയത്. ഇന്ന് ജയിച്ചെങ്കിലും നിരാശയോടെ എടികെ കളം വിട്ടു.
