ലോക്‌സഭയിലെ കോണ്‍ഗ്രസ് കക്ഷി നേതാവ് അധീര്‍ രഞ്ജന്‍ ചൗധരിയെ സസ്‌പെന്‍ഡ് ചെയ്തത് പിന്‍വലിക്കണമെന്ന് കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെ. നീരവ് എന്നാല്‍ ഹിന്ദിയില്‍ ശാന്തം എന്നാണ് അര്‍ത്ഥമെന്നും ഇതാണ് അധീര്‍ രഞ്ജന്‍ പറഞ്ഞതെന്നും ഖാര്‍ഗെ വാദിച്ചു.
വ്യാഴാഴ്ച പാര്‍ലമെന്റില്‍ പ്രധാനമന്ത്രിക്കെതിരായി സംസാരിച്ച അധീര്‍ രഞ്ജന്‍ നീരവ് മോദിയെ കുറിച്ചും പരാമര്‍ശിച്ചിരുന്നു. മോദിക്കും കേന്ദ്രമന്ത്രിമാര്‍ക്കുമെതിരായ പരാമര്‍ശങ്ങളില്‍, തുടര്‍ച്ചയായി മോശം പെരുമാറ്റം കാഴ്ച വയ്ക്കുന്നുവെന്ന് ചൂണ്ടിക്കാട്ടിയാണ് അധീര്‍ രഞ്ജന്‍ ചൗധരിയെ സസ്‌പെന്‍ഡ് ചെയ്തത്. മണിപ്പൂര്‍ വിഷയത്തില്‍ പ്രതിപക്ഷം അവതരിപ്പിച്ച അവിശ്വാസ പ്രമേയത്തില്‍ പ്രധാനമന്ത്രി മറുപടി പറയവേ ആയിരുന്നു സംഭവം.
ജനാധിപത്യത്തെ സംരക്ഷിക്കണമെന്ന് ചൂണ്ടിക്കാട്ടി അധീര്‍ രഞ്ജന്റെ സസ്‌പെന്‍ഷന്‍ പിന്‍വലിക്കണമെന്ന് രാജ്യസഭാധ്യക്ഷന്‍ ജഗ്ദീപ് ധന്‍കറിനോട് ഖാര്‍ഗെ ആവശ്യപ്പെട്ടു. കോണ്‍ഗ്രസ് സഭാ കക്ഷിനേതാവെന്ന നിലയില്‍ അദ്ദേഹം ഭാഗമാകുന്ന നിരവധി പാര്‍ലമെന്ററി കമ്മിറ്റികളില്‍ നിന്ന് മാറിനില്‍ക്കേണ്ടിവരുമെന്നും ഖാര്‍ഗെ വ്യക്തമാക്കി.
