ന്യൂഡൽഹി: പ്രധാനമന്ത്രി നരേന്ദ്ര മോദിയെ ഭയമില്ലെന്ന് മുതിർന്ന കോൺഗ്രസ് നേതാവ് രാഹുൽ ഗാന്ധി. നാഷണൽ ഹെറാൾഡ് കേസിനെ കുറിച്ചുള്ള ചോദ്യത്തിനായിരുന്നു രാഹുൽ ഗാന്ധിയുടെ മറുപടി. താങ്കൾ പറയുന്നത് നാഷണൽ ഹെറാൾഡിനെക്കുറിച്ചാണ്. ഇത് ഭീഷണിപ്പെടുത്താനുള്ള ശ്രമമാണ്. അവർ വിചാരിക്കുന്നു ചെറിയ സമ്മർദ്ദം കൊണ്ട് ഞങ്ങളെ നിശബ്ദരാക്കാൻ കഴിയുമെന്ന് . ഞങ്ങൾ ഭയപ്പെടില്ല,നരേന്ദ്ര മോദിയെ ഭയപ്പെടുന്നില്ല. അവർക്ക് എന്ത് വേണമെങ്കിലും ചെയ്യാമെന്ന് രാഹുൽ ഗാന്ധി പറഞ്ഞു.
നാഷണൽ ഹെറാൾഡിന്റെ വിവിധ ഓഫീസുകളിൽ ഇ.ഡി പരിശോധന നടത്തിയിരുന്നു. ഡൽഹിയിൽ 12 ഇടങ്ങളിൽ പരിശോധന നടന്നതായാണ് റിപ്പോർട്ട്. കോൺഗ്രസ് അധ്യക്ഷ സോണിയാ ഗാന്ധി മുൻ അധ്യക്ഷൻ രാഹുൽ ഗാന്ധി എന്നിവരിൽ നിന്നും മൊഴിയെടുത്തതിന് പിന്നാലെയാണ് പരിശോധന.
നാഷണൽ ഹെറാൾഡ് ആസ്ഥാനത്തെ റെയ്ഡിന് പിന്നാലെ കോൺഗ്രസ് നേതാക്കൾ ഡയറക്ടർമാരായ യങ് ഇന്ത്യൻ കമ്പനിയുടെ ഡൽഹി ഓഫിസ് എൻഫോഴ്സ്മെന്റ് ഡയറക്ടറേറ്റ് (ഇ.ഡി) മുദ്ര വെച്ചിരുന്നു. ഇതിന് പിന്നാലെയാണ് ഇക്കാര്യത്തിൽ രാഹുൽ ഗാന്ധിയുടെ പ്രസ്താവന വന്നത്.