ദീർഘനാളാത്തെ പ്രണയത്തിനൊടുവിൽ വിവാഹിതരാകാൻ ഒരുങ്ങുകയാണ് നടി നയൻതാരയും സംവിധായകൻ വിഘ്നേഷ് ശിവനും. വിവാഹവാർത്ത ഔദ്യോഗികമായി സ്ഥിരീകരിച്ചിരിക്കുകയാണ് വിഘ്നേഷ് ഇപ്പോൾ. വ്യാഴാഴ്ച്ച മഹാബലിപുരത്ത് വച്ചാണ് വിവാഹമെന്നും കുടുംബാംഗങ്ങളും അടുത്ത സുഹൃത്തുക്കളും മാത്രമാകും പങ്കെടുക്കുകയെന്നും വിഘ്നേഷ് പറഞ്ഞു.
“തിരുപ്പതിയിൽ വിവാഹം നടത്താനായിരുന്നു ആദ്യം തീരുമാനിച്ചത്. പക്ഷെ പ്രായോഗിക പ്രശ്നങ്ങൾ കാരണം അത് പറ്റിയില്ല. ബന്ധുക്കളെയെല്ലാം തിരുപ്പതിയിലെത്തിക്കുക പ്രയാസമാണ്. അതുകൊണ്ടാണ് മഹാബലിപുരത്തേക്ക് മാറ്റിയത്”, വിഘ്നേഷ് പറഞ്ഞു.
സിനിമ സ്റ്റൈൽ വിവാഹ ചടങ്ങാണ് അണിയറയിൽ ഒരുങ്ങുന്നത്. സംവിധായകൻ ഗൗതം മേനോനായിരിക്കും ചടങ്ങിന്റെ സംവിധാനം.
മഹാബലിപുരത്തെ ഫൈവ് സ്റ്റാർ ഹോട്ടലിൽ ഹിന്ദു ആചാരപ്രകാരമായിരിക്കും വിവാഹം നടക്കുക. വിവാഹത്തിന് മുപ്പത് പേർക്കാണ് ക്ഷണം. സിനിമാ പ്രവർത്തകർക്കും സുഹൃത്തുക്കൾക്കുമായി വിരുന്ന് സംഘടിപ്പിക്കും. രജനികാന്ത്, സാമന്ത, കമൽ ഹാസൻ, വിജയ്, അജിത്ത്, സൂര്യ, കാർത്തി, ശിവകാർത്തിയേകൻ, വിജയ് സേതുപതി തുടങ്ങിയവർ അതിഥികളായിരിക്കുമെന്നും റിപ്പോർട്ടുകളുണ്ട്.
