ന്യൂഡൽഹി: നോവവാക്സിന് അടിയന്തര ഉപയോഗത്തിന് ഡിസിജിഐ (ഡ്രഗ്സ് കൺട്രോളർ ഓഫ് ഇന്ത്യ) അനുമതി. 12നും 18 വയസിനും ഇടയിൽ പ്രായമുള്ള കുട്ടികൾക്ക് കുത്തിവയ്ക്കാനാണ് സിറം ഇൻസ്റ്റിറ്റ്യൂട്ട് പുറത്തിറക്കുന്ന നോവവാക്സിന് അനുമതി നൽകിയത്.
രാജ്യത്ത് അനുമതി ലഭിക്കുന്ന നാലാമത്തെ വാക്സിനാണിത്. അമേരിക്കൻ മരുന്ന് നിർമാണ കമ്പനിയായ നോവവാക്സ് ഇന്ത്യയിലെ സിറം ഇൻസ്റ്റിറ്റ്യൂട്ടുമായി നേരത്തേ ധാരണയിലെത്തിയിരുന്നു. വരും ദിവസങ്ങളിൽ പുതിയതായി അനുമതി ലഭിച്ച വാക്സിൻ വിതരണം ചെയ്ത് തുടങ്ങും.