തിരുവനന്തപുരം: കൊല്ലത്തിനു പിന്നാലെ തിരുവനന്തപുരത്തും വായ്പാ തിരിച്ചടവ് മുടങ്ങിയതിന് വീടിന്റെ ഭിത്തിയില് സ്പ്രേ പെയിന്റുകൊണ്ട് ഉടമസ്ഥാവകാശം എഴുതി സ്വകാര്യ ധനകാര്യ സ്ഥാപനം. ചോളാ ഫിനാന്സ് എന്ന ധനകാര്യസ്ഥാപനമാണ് ക്രൂരതയ്ക്ക് പിന്നില്.
കോവിഡിനെ തുടര്ന്നുണ്ടായ സാമ്പത്തിക പ്രതിസന്ധിയിലാണ് മൂന്നു മാസത്തെ തിരിച്ചടവ് മുടങ്ങിയത്. ഗോപന്, നാഗസുബ്രഹ്മണ്യം എന്നിവരാണ് വീട്ടിലെത്തി സ്പ്രേ പെയിന്റടിച്ചതെന്ന് വീട്ടുകാര് പറയുന്നു. അതേസമയം തനിക്കൊന്നുമറിയില്ലെന്നാണ് ധനകാര്യസ്ഥാപനത്തിലെ ജീവനക്കാരനായ ഗോപന് പ്രതികരിച്ചത്.
27 ലക്ഷം രൂപയാണ് അണ്ടൂര്കോണം സ്വദേശി ഹജിത്ത് കുമാര് വായ്പ എടുത്തത്. 16 ശതമാനമാണ് പലിശ നിരക്ക്. മുടങ്ങിയ തവണകള് തിരിച്ചടച്ചാലും പെയിന്റ് മായിക്കില്ലെന്ന് ചോളാ ഫിനാന്സ് അറിയിച്ചതിനെ തുടര്ന്ന് പണമടയ്ക്കുന്നില്ലെന്ന് ഇയാള് തീരുമാനിക്കുകയായിരുന്നു.
നേരത്തെ കൊല്ലത്തും ചോള ഫിനാന്സ് സമാന രീതിയില് വീടുകളില് സ്പ്രേ പെയിന്റ് അടിച്ചിരുന്നു. ജീവനക്കാരുടെ ഭാഗത്തു നിന്നു വന്ന വീഴ്ചയാണെന്നും കര്ശന നടപടിയുണ്ടാകുമെന്നുമായിരുന്നു അന്നു ധനകാര്യസ്ഥാപനത്തിന്റെ വിശദീകരണം.