കോട്ടയം: സിൽവർലൈൻ അലൈൻമെന്‍റുമായി ബന്ധപ്പെട്ട് വെളിപ്പെടുത്തിയ ആരോപണങ്ങളിൽ ഉറച്ച് തിരുവഞ്ചൂർ രാധാകൃഷ്ണൻ എംഎൽഎ. ചങ്ങനാശേരി മുളക്കുഴയിലെ അലെയ്മെന്‍റിൽ രണ്ട് കിലോമീറ്റർ മാറ്റം വരുത്തിയെന്നും അലെയ്മെന്‍റ് രണ്ട് കിലോമീറ്റർ ഇടത്തോട്ട് മാറിയെന്നും അദ്ദേഹം പറഞ്ഞു.
ഈ മാറ്റം എന്തിനാണെന്ന് കെ റെയിൽ വ്യക്തമാക്കണം. അല്ലെങ്കിൽ തന്‍റെ ആക്ഷേപം ശരിയാണെന്നാണ് മനസിലാക്കേണ്ടത്. സജി ചെറിയാന് ഇക്കാര്യത്തിൽ എന്തോ താത്പര്യമുണ്ട്. അതുകൊണ്ടാണ് ഇതിൽ കയറിപ്പിടിച്ചത്. രണ്ട് കിലോമീറ്റർ വ്യത്യാസം വന്നത് എന്തുകൊണ്ടാണെന്ന് നാട്ടുകാരോട് പറഞ്ഞിട്ടില്ല. മറുപടി പറയാൻ മന്ത്രി ബാധ്യസ്ഥനാണ്. ഇതുപോലെ പലയിടത്തും അലെയ്മെന്‍റ് മാറ്റിയെന്നാണ് അറിവെന്നും തിരുവഞ്ചൂർ പറഞ്ഞു.
മുളക്കുഴയിലെ അലെൻമൈന്‍റിൽ രണ്ട് കിലോമീറ്റർ മാറ്റം വരുത്തിയെന്ന ആരോപണം ശരിവയ്ക്കുന്നതിന് തെളിവായി പുതിയ മാപ്പും തിരുവഞ്ചൂർ രാധാകൃഷ്ണൻ പുറത്തുവിട്ടിട്ടുണ്ട്.
ബുധനാഴ്ചയാണ് മന്ത്രിക്കെതിരെ ഗുരുതര ആരോപണവുമായി തിരുവഞ്ചൂർ രാധാകൃഷ്ണൻ രംഗത്തെത്തിയത്. സജി ചെറിയാന്‍റെ വീട് സംരക്ഷിക്കാൻ വേണ്ടി ചെങ്ങന്നൂരിൽ കെ റെയിൽ അലൈൻമെന്‍റിൽ മാറ്റം വരുത്തിയെന്നാണ് തിരുവഞ്ചൂരിന്‍റെ ആരോപണം.
എന്നാൽ ആരോപണങ്ങളെ മന്ത്രി തള്ളിക്കളഞ്ഞു. അലൈൻമെന്‍റ് തീരുമാനിക്കുന്നത് താനല്ലെന്നും ഇനി മാറ്റുകയാണെങ്കിൽ തന്നെ വീട് വിട്ടു നൽകാൻ തയാറാണെന്നും സജി ചെറിയാൻ പറഞ്ഞു.
