കീവ്: യുക്രെയ്ന് നിയന്ത്രണങ്ങളില്ലാതെ സൈനിക സഹായം നൽകണമെന്ന് നാറ്റോയ് ആവശ്യപ്പെട്ട് പ്രസിഡന്‍റ് വോളോദിമിർ സെലൻസ്കി. ജനങ്ങളെയും നഗരങ്ങളെയും രക്ഷിക്കാൻ നിയന്ത്രണങ്ങളില്ലാത്ത സൈനിക സഹായമാണ് ആവശ്യമെന്ന് യുക്രെയ്ൻ പ്രസിഡന്‍റ് പറഞ്ഞു.
റഷ്യ അതിന്‍റെ മുഴുവൻ ആയുധശേഖരവും നിയന്ത്രണങ്ങളില്ലാതെ തങ്ങൾക്കെതിരെ ഉപയോഗിക്കുകയാണ്- സെലൻസ്കി വീഡിയോ സന്ദേശത്തിലൂടെ നാറ്റോ പ്രതിനിധികളോട് പറഞ്ഞു.
നിങ്ങളുടെ വിമാനങ്ങളുടെ ഒരു ശതമാനം ഞങ്ങള്‍ക്ക് തരൂ, നിങ്ങളുടെ ടാങ്കുകളുടെ ഒരു ശതമാനം ഞങ്ങള്‍ക്ക് തരൂ. ഒരു ശതമാനം- സെലൻസ്കി അഭ്യർഥിച്ചു.
റഷ്യ ഫോസ്ഫറസ് ബോംബ് പ്രയോഗിച്ചതായി സെലൻസ്കി ആരോപിച്ചു. ഓക്സിജനുമായി സമ്പർക്കത്തിൽ വരുമ്പോൾ തീപിടിക്കുകയും ഗുരുതരമായ പൊള്ളലേൽക്കുകയും ചെയ്യുന്ന പൊടി വിതറിയതായി അദ്ദേഹം പറഞ്ഞു. ഇന്ന് രാവിലെ യുക്രെയ്നിലെ തെരുവുകളില്‍ റഷ്യ ഫോസ്ഫറസ് ബോംബുകള്‍ ഉപയോഗിച്ചു. മുതിര്‍ന്നവരും കുട്ടികളും വീണ്ടും വീണ്ടും കൊല്ലപ്പെടുകയാണ്- യുക്രെയ്ൻ പ്രസിഡന്‍റ് പറഞ്ഞു.
