ന്യൂഡല്‍ഹി: തനിക്കെതിരെ കോൺഗ്രസ് പാർട്ടിക്ക് എന്ത് നടപടി വേണമെങ്കിലും സ്വീകരിക്കാമെന്ന് എഐസിസി ജനറല്‍ സെക്രട്ടറി കെ.സി. വേണുഗോപാൽ. തെരഞ്ഞെടുപ്പ് തോൽവിയിൽ സംഘടനാ ജനറൽ സെക്രട്ടറിയുടെ പങ്ക് ചർച്ചയാകുന്നത് ആദ്യമാണെന്നും അദ്ദേഹം പറഞ്ഞു. തന്നെ നീക്കുന്നതടക്കം കോൺഗ്രസ് അധ്യക്ഷ സോണിയ ഗാന്ധിക്ക് എന്തുനടപടിയും സ്വീകരിക്കാം. സ്ഥാനമാനങ്ങള്‍ എല്ലാ കാലത്തും ഒരുകൂട്ടര്‍ക്ക് അവകാശപ്പെട്ടതല്ല.
പാര്‍ട്ടിയ്ക്ക് ദയനീയ പരാജമുണ്ടായാല്‍ പ്രവര്‍ത്തകര്‍ക്ക് വിഷമമുണ്ടാകും. അവര്‍ പലരീതിയില്‍ പ്രതികരിച്ചെന്നുവരും. ഓരോരുത്തര്‍ക്കും ഓരോ ഭാഷയായിരിക്കും. താനതിനെ പോസിറ്റീവായാണ് കാണുന്നത്.
കേരളത്തിലെ പ്രവര്‍ത്തകര്‍ക്ക് തന്നെ കുറിച്ച് പറയാന്‍ അവകാശമുണ്ട്. വിമര്‍ശനങ്ങള്‍ക്ക് അതീതനായ ആളല്ല താന്‍. തന്നെയല്ല വിമര്‍ശിക്കുന്നത്, താന്‍ വഹിക്കുന്ന പദവിയെയാണ് വിമര്‍ശിക്കുന്നത്. വിമര്‍ശനങ്ങളില്‍ കോണ്‍ഗ്രസ് നന്നായിക്കാണാന്‍ ആഗ്രഹിക്കുന്നവരുടെ നല്ല ചിന്താഗതിയാണ് താന്‍ കാണാന്‍ ആഗ്രഹിക്കുന്നത്- അദ്ദേഹം കൂട്ടിച്ചേര്‍ത്തു.
