തിരുവനന്തപുരം: സംസ്ഥാന പോലീസ് മേധാവി ഡോ. ഷേയ്ക്ക് ദർബേഷ് സാഹിബിന് നല്കിയ ഗാര്ഡ് ഓഫ് ഓണറില് പിഴവുവരുത്തിയ പോലീസ് ഉദ്യോഗസ്ഥനെതിരേ നടപടി. കെഎപി 5ബി ബറ്റാലിയനിലെ അസിസ്റ്റന്റ് കമാന്ഡന്റ് എ. ഗിരീഷ് കുമാറിനെ ഒരാഴ്ചത്തെ നിര്ബന്ധിത പരിശീലനത്തിനയച്ചു.
പാലക്കാട് ജില്ലയിലെ മുട്ടിക്കുളങ്ങരയിലുള്ള കെഎപി ബറ്റാലിയനിലാണ് പരിശീലനം. സെറിമോണിയല് പരേഡ്, ഗാര്ഡ് ഡ്യൂട്ടി എന്നിവയിലാണ് നിര്ബന്ധിത പരിശീലനം. അസിറ്റന്റ് കമാന്ഡന്റ് റാങ്കിലുള്ള ഉദ്യോഗസ്ഥന്റെ മേല്നോട്ടത്തില് ആകും പരിശീലനം. ജൂലൈ 12 വരെയാണ് നിര്ബന്ധിത പരിശീലന കാലയളവ്.
സംസ്ഥാന പോലീസ് മേധാവിയായി ചുമതലയേൽക്കാനെത്തിയ ഷേയ്ക്ക് ദർബേഷ് സാഹിബിന് കഴിഞ്ഞ ദിവസം നൽകിയ ഗാർഡ് ഓഫ് ഓണറിലാണ് പിഴവു സംഭവിച്ചത്. പരേഡിൽ പങ്കെടുത്ത ഉദ്യോഗസ്ഥരുടെ പരിശോധന കഴിഞ്ഞു മടങ്ങിയെത്തി സേനാംഗങ്ങൾക്ക് അഭിമുഖമായി നിന്ന പോലീസ് മേധാവിക്ക് സല്യൂട്ട് നൽകുന്നതിനുളള കമാൻഡാണ് തെറ്റിയത്.
അറ്റൻഷൻ പൊസിഷനിൽ നിന്ന അംഗങ്ങളോട് കമാൻഡ് നൽകിയ ഉദ്യോഗസ്ഥൻ വീണ്ടും അറ്റൻഷനിൽ നിൽക്കാൻ ആവശ്യപ്പെട്ടതോടെ പരേഡിൽ പങ്കേടുത്ത ഉദ്യോഗസ്ഥർക്ക് സംശയമായി.
ചിലർ അറ്റൻഷനിൽ തുടർന്നപ്പോൾ മറ്റുചിലർ സല്യൂട്ട് നൽകുന്നതിന്റെ ഭാഗമായി തോക്ക് ഉയർത്തി. എന്നാൽ ഇതു ഗൗനിക്കാതെ പോലീസ് മേധാവി തിരിച്ചു സല്യൂട്ട് നൽകി ചുമതലയേൽക്കാനായി ഓഫീസിലേക്ക് പോയി.