ന്യൂഡൽഹി: സിപിഎം പാർട്ടി കോൺഗ്രസ് സെമിനാറിൽ പങ്കെടുക്കുമെന്ന് അറിയിച്ച മുതിർന്ന നേതാവ് കെ.വി. തോമസിനെതിരെ രൂക്ഷ വിമർശനവുമായി രാജ്മോഹൻ ഉണ്ണിത്താൻ. കെ.വി. തോമസ് കാണിച്ചത് നന്ദികേടാണെന്നും കിട്ടാവുന്ന എല്ലാ പദവികളും നേടിയ വ്യക്തിയാണ് അദ്ദേഹവുമെന്നും ഉണ്ണിത്താൻ പറഞ്ഞു.
അധ്യക്ഷയെ ധിക്കരിച്ച് പോകുന്നയാള്‍ കോണ്‍ഗ്രസുകാരനല്ല. എന്താണ് കെ.വി. തോമസ് ഇനി ആഗ്രഹിക്കുന്നത് എന്ന് അറിയില്ല. കഴിഞ്ഞ കുറെക്കാലമായി തോമസിന്‍റെ ശരീരം കോൺഗ്രസിലും മനസ് സിപിഎമ്മിലുമാണ്.
സിപിഎം ചതിക്കുഴിയില്‍ തോമസ് വീണു. കേരളത്തിലെ കോൺഗ്രസ് പ്രവർത്തകരുടെ മനസിൽ കെ.വി. തോമസിന് ഇനി സ്ഥാനമില്ല. കെ.വി. തോമസ് പാർട്ടിയെ മുഴുവൻ അപഹാസ്യമാക്കി. കെ.വി. തോമസ് കോൺഗ്രസാണെന്ന് പറയുന്നതിൽ നാണക്കേടാണ്. ഈ പാർട്ടിക്കുള്ളില് നിന്ന് കൊണ്ട് ചാരപ്പണി നടത്തുന്നവർ ഇനിയുമുണ്ടെങ്കിൽ അവർ പുറത്തുപോകണം. എങ്കിൽ കോൺഗ്രസ് പാർട്ടി സംശുദ്ധമാകുമെന്നും ഉണ്ണിത്താൻ വ്യക്തമാക്കി.
