കൊച്ചി: നടിയെ ആക്രമിച്ച കേസില്‍ നടി കാവ്യാ മാധവനെ അന്വേഷണസംഘം ചോദ്യം ചെയ്യും. സാക്ഷിമൊഴികളിലുള്ള “മാഡം’ കാവ്യയാണോ എന്ന അന്വേഷണത്തിന്‍റെ ഭാഗമായാണ് ചോദ്യംചെയ്യൽ.
ഇതിനായി കാവ്യയ്ക്ക് നോട്ടീസ് നല്‍കും. കേസില്‍ ദിലീപിനെ തിങ്കളാഴ്ച ചോദ്യം ചെയ്യാൻ അന്വേഷണ ഉദ്യോഗസ്ഥർ തീരുമാനിച്ചിട്ടുണ്ട്. കേസിന്‍റെ തുടരന്വേഷണം അവസാനഘട്ടത്തിൽ എത്തിനില്‍ക്കെയാണ് ക്രൈംബ്രാഞ്ചിന്‍റെ നടപടി.
കേസിലെ മുഖ്യപ്രതി പള്‍സര്‍ സുനി മാഡത്തെക്കുറിച്ചുള്ള വെളിപ്പെടുത്തല്‍ നടത്തിയിരുന്നു. നടിയുടെ അപകീര്‍ത്തികരമായ ദൃശ്യം പോലീസ് പിടിയിലാകുന്നതിന് മുന്‍പ് മാഡത്തിന് കൈമാറിയെന്നായിരുന്നു വെളിപ്പെടുത്തല്‍. എന്നാല്‍ മാഡത്തെക്കുറിച്ച് കൃത്യമായ തെളിവുകള്‍ ലഭിക്കാത്തതിനാല്‍ ഇതില്‍ കാര്യമായ അന്വേഷണം നടന്നിരുന്നില്ല. സംവിധായകന്‍ ബാലചന്ദ്രകുമാറിന്‍റെ വെളിപ്പെടുത്തലോടെയാണ് വീണ്ടും മാഡത്തിലേക്കും വിഐപിയിലേക്കും അന്വേഷണം എത്തിയത്.
