ചെന്നൈ: തീവ്ര വോട്ടര്‍ പട്ടിക പരിഷ്കരണ (എസ്ഐആര്‍) നടപടികളുമായി സഹകരിക്കില്ലെന്ന് വ്യക്തമാക്കി തമിഴ്നാട്ടിലെ റവന്യു ജീവനക്കാര്‍. നാളെ മുതൽ എസ്ഐആര്‍ നടപടികളിൽ നിന്നും വിട്ടുനിൽക്കുമെന്ന് ജീവനക്കാർ അറിയിച്ചു. അമിത ജോലിഭാരം ചൂണ്ടിക്കാട്ടിയാണ് ജീവനക്കാർ നടപടികളുമായി സഹകരിക്കില്ലെന്ന് അറിയിച്ചിട്ടുള്ളത്. ജില്ലാ കലക്ടര്‍മാര്‍ മാനസികമായി സമ്മര്‍ദത്തിലാക്കുന്നുവെന്നും വേണ്ട വിധത്തിലുള്ള പരിശീലനം പോലും നൽകാതെയാണ് നടപടികൾക്കായി ചുമതലപ്പെടുത്തിയിട്ടുള്ളതെന്നും ജീവനക്കാരുടെ സംഘടനയായ ഫെറ വ്യക്തമാക്കി. മാത്രമല്ല ആവശ്യത്തിന് ജീവനക്കാരില്ലെന്നും ഫണ്ട് അനുവദിക്കുന്നില്ലെന്നും ആരോപണമുയരുന്നുണ്ട്.

ബിഎൽഒമാരായി ജോലി ചെയ്യുന്ന അങ്കണവാടി ജീവനക്കാർ, മുൻസിപ്പൽ – കോര്‍പ്പറേഷൻ ജീവനക്കാർ, അധ്യാപകർ, പാചക തൊഴിലാളികൾ തുടങ്ങിയവരുടെ പിന്തുണ തങ്ങൾക്കുണ്ടെന്നാണ് റവന്യു ജീവനക്കാരുടെ സംഘടന പറയുന്നത്. ഇന്ന് എല്ലാ താലൂക്ക്, ജില്ലാ ആസ്ഥാനങ്ങളിലും ഇവർ പ്രതിഷേധം സംഘടിപ്പിക്കുന്നുണ്ട്. ജില്ലാ കലക്ടർമാർ അർധരാത്രി വരെ നടത്തുന്ന അവലോകന യോഗങ്ങളും ദിവസം മൂന്ന് തവണയുള്ള വിഡിയോ കോൺഫറന്‍സുകളും അവസാനിപ്പിക്കണമെന്നും ജീവനക്കാര്‍ ആവശ്യപ്പെടുന്നു.

ചെറിയ ചില പ്രശ്നങ്ങൾ ഒഴിച്ച് നിർത്തിയാൽ എസ്ഐആർ നടപടിക്രമങ്ങൾ നല്ലരീതിയിൽ നടക്കുന്നുണ്ടെന്ന് ചീഫ് ഇലക്ടറൽ ഓഫിസറുടെ ഓഫിസ് അറിയിച്ചു. 6.47 കോടി വോട്ടർമാരിൽ 92% പേർക്കും ഇതിനകം ഫോമുകൾ ലഭിച്ചിട്ടുണ്ട്. എന്നാൽ വാടകക്കാർ, താമസസ്ഥലം മാറിയവർ, വിവാഹശേഷം ഭർത്താവിന്റെ സ്ഥലത്തേക്ക് താമസം മാറിയ സ്ത്രീകൾ തുടങ്ങിയ ആളുകൾക്ക് ഫോമുകൾ ലഭ്യമായിട്ടില്ലെന്നാണ് പ്രാദേശിക മാധ്യമങ്ങൾ റിപ്പോർട്ട് ചെയ്തിട്ടുള്ളത്. എന്നാൽ ബിഎൽഒമാർക്ക് ചില നടപടിക്രമങ്ങളെപ്പറ്റിയോ, ചില പ്രത്യേക കേസുകൾ എങ്ങനെ കൈകാര്യം ചെയ്യണം എന്നതിനെപ്പറ്റിയോ വ്യക്തമായ ധാരണയില്ലെന്ന തരത്തിലുള്ള ആരോപണം ഉയരുന്നുണ്ട്. ഇത്തരം ആശങ്കകൾ അറിയിക്കുമ്പോൾ ഫോമുകളുടെ വിതരണം നന്നായി നടക്കുന്നുണ്ടെന്നും ഫോമുകൾ പൂരിപ്പിക്കുന്നതിൽ ആളുകൾ നേരിടുന്ന പ്രശ്നങ്ങൾ ഫോമുകൾ തിരികെ ശേഖരിക്കുന്ന സമയത്ത് പരിഹരിക്കുമെന്നും ആണ് തിരഞ്ഞെടുപ്പ് കമ്മീഷൻ ഉദ്യോഗസ്ഥർ നൽകുന്ന മറുപടി.

കൊൽക്കത്ത: മകനുമൊന്നിച്ച് ബൈക്കിൽ പോകുന്നതിനിടെ തേനീച്ചകളുടെ കുത്തേറ്റ വയോധികന് ദാരുണാന്ത്യം. മുൻ പ്രധാന അധ്യാപകനായ 62 -കാരനായ നിർമ്മൽ ദത്ത എന്നയാളാണ് തേനീച്ച കുത്തേറ്റ് കൊല്ലപ്പെട്ടത്. പശ്ചിമ ബംഗാളിലെ ദുർഗാപൂരിൽ നടന്ന സംഭവത്തിൽ നിർമ്മൽ ദത്തയുടെ മുഖത്തും തലയിലുമായി 890ലേറെ കുത്തുകളാണ് കിട്ടിയത്. ദുർഗാപൂറിലെ ആർ ഇ മോഡൽ സ്കൂളിലെ മുൻ പ്രധാന അധ്യാപകനായിരുന്നു നിർമ്മൽ ദത്ത.

ദുർഗാപൂരിൽ നിന്ന് സുകാന്തപ്പള്ളിയിലുള്ള വീട്ടിലേക്ക് ഡോക്ടർ കൂടിയായ മകനൊപ്പം പോകുമ്പോഴാണ് നിർമ്മൽ ദത്തയെ തേനീച്ച ആക്രമിച്ചത്. മേജർ പാർക്കിന് സമീപത്ത് വച്ച് നിർമ്മൽ ദത്തയുടെ കഴുത്തിലായി എന്തോ കുത്തിയത് പോലെ തോന്നി. ഇതോടെ ഇവർ ബൈക്ക് നിർത്തി എന്താണ് സംഭവമെന്ന് പരിശോധിക്കാൻ നോക്കുന്നതിനിടെയാണ് നിർമ്മൽ ദത്തയെ തേനീച്ച വളഞ്ഞിട്ട് കുത്തിയത്. നിർമ്മൽ ദത്ത ഹെൽമറ്റ് ഊരി മകന് കുത്തേറ്റതായി പറഞ്ഞ സ്ഥലം നോക്കുന്നതിനിടെ കൂട്ടമായി എത്തിയ തേനീച്ചകൾ അദ്ദേഹത്തിന്റെ മുഖത്ത് ആക്രമിച്ചു. 890 തവണയാണ് കുത്തിയത്. ഇതോടെ വയോധികൻ റോഡിൽ കുഴഞ്ഞ് വീണു.

പിന്നാലെ മകനെയും തേനീച്ച ആക്രമിച്ചു. ഇയാൾ സഹായത്തിനായി നിലവിളിച്ചെങ്കിലും ആരും രക്ഷിക്കാനെത്തിയില്ല. ഏറെ വൈകി സംഭവ സ്ഥലത്തെത്തിയ പൊലീസ് പരിക്കേറ്റവരെ പുതപ്പുകളിൽ പൊതിഞ്ഞ് സമീപത്തെ സ്വകാര്യ ആശുപത്രിയിൽ എത്തിച്ചു. മകനെ രക്ഷിക്കാൻ കഴിഞ്ഞെങ്കിലും നിർമ്മൽ ദത്ത മരണത്തിന് കീഴടങ്ങുകയായിരുന്നു. പാർക്കിലെ മരത്തിലുണ്ടായിരുന്ന കൂട്ടിൽ പക്ഷി തട്ടിയതോടെയാണ് തേനീച്ച കൂട്ടം ഇളകിയതെന്നാണ് ദൃക്സാക്ഷികൾ പറയുന്നത്.