പ്രശസ്ത തമിഴ് നടനും ഡി.എം.ഡി.കെ നേതാവുമായ വിജയകാന്ത് (71) അന്തരിച്ചു. ചെന്നൈയില് വ്യാഴാഴ്ച രാവിലെയായിരുന്നു അന്ത്യം. അസുഖബാധിതനായിരുന്ന വിജയകാന്ത് കഴിഞ്ഞ കുറച്ചുകാലമായി ചികിത്സയിലായിരുന്നു. കഴിഞ്ഞ ദിവസം ചെന്നൈയിലെ സ്വകാര്യ ആശുപത്രിയില് പ്രവേശിപ്പിച്ച അദ്ദേഹത്തിന് ഇന്ന് കോവിഡ് സ്ഥിരീകരിച്ചിരുന്നു. ആരോഗ്യനില ഗുരുതരമായതോടെ വെന്റിലേറ്ററിലേക്ക് മാറ്റുകയായിരുന്നു.
എണ്പതുകളിലും തൊണ്ണൂറുകളിലും തമിഴില് നിരവധി സൂപ്പര്ഹിറ്റുകള് നല്കിയ വിജയകാന്തിനെ ആരാധകര് ക്യാപ്റ്റനെന്നാണ് വിളിച്ചിരുന്നത്. ദേശീയ മുര്പോക്ക് ദ്രാവിഡ കഴകം എന്ന രാഷ്ട്രീയപാര്ട്ടിയുടെ സ്ഥാപകനേതാവാണ്. രണ്ടുതവണ തമിഴ്നാട് നിയമസഭാംഗമായിരുന്നു. ഭാര്യ പ്രേമലത. മക്കള് ഷണ്മുഖ പാണ്ഡ്യന്, വിജയപ്രഭാകരന്.
1952 ഓഗസ്റ്റ് 25 ന് മധുരയില് ജനിച്ച വിജയകാന്തിന്റെ ഔദ്യോഗിക പേര് വിജയരാജ് അളഗര്സ്വാമി എന്നാണ്. കെ.എന്.അളഗര്സ്വാമിയും ആണ്ടാള് അളഗര്സ്വാമിയുമാണ് മാതാപിതാക്കള്.