കനത്ത മഴയിൽ മണ്ണിടിഞ്ഞ് മാഹി ബൈപാസ് റോഡിൽ ബീം തകർന്നു. ഉമ്പാച്ചി കുന്നിൽ തിങ്കളാഴ്ച ഉച്ചയോടെയാണ് സംഭവം. നിർമാണം നടക്കുന്ന ബൈപാസിലാണ് സംഭവം. മണ്ണിടിഞ്ഞതിനെ തുടർന്ന് ബീം പൂർണമായും തകർന്നു വീണു. ബൈപാസിൽ പലയിടത്തും മണ്ണിടിച്ചിൽ രൂക്ഷമാണ്. ബീം തകർന്നതോടെ ഈ ഭാഗത്ത് ബൈപാസ് പണി തടസ്സപ്പെട്ടു. മാഹി -മുഴപ്പിലങ്ങാട് ബൈപാസ് നിർമാണ പ്രവൃത്തി നടക്കുന്ന പള്ളൂർ സബ് സ്റ്റേഷന് സമീപത്തെ മണൽ കുന്നുമ്മൽ ഭാഗത്താണ് സംഭവം.
കഴിഞ്ഞ ദിവസവും ഇതിന് സമീപത്ത് മണ്ണിടിഞ്ഞ് റോഡിലേക്ക് വീണിരുന്നു. മണൽ കുന്നുമ്മൽ ജാനുവും കുടുംബവും താമസിച്ചിരുന്ന വീട് നിൽക്കുന്ന പറമ്പിലെ മണ്ണാണ് ഇടിഞ്ഞ് വീണത്. വീടും ഏതു സമയവും ഇടിഞ്ഞ് വീഴാവുന്ന അവസ്ഥയിലാണുള്ളത്. വീടിന്റെ അടുക്കള ഭാഗവും ചുറ്റുമതിലിന്റെ ഭാഗവും താഴേക്ക് പതിച്ചു. ബൈപാസ് റോഡരികിൽ കെട്ടിയ സംരക്ഷണഭിത്തിയും തകർത്താണ് മണ്ണ് റോഡിലേക്ക് പതിച്ചത്.