തിരുവനന്തപുരം: സംസ്‌ഥാനത്ത്‌ കനത്തമഴ തുടരും. ഇന്ന് തൃശൂര്‍, പാലക്കാട്‌, മലപ്പുറം, കോഴിക്കോട്‌, വയനാട്‌, കണ്ണൂര്‍, കാസര്‍ഗോഡ്‌ ജില്ലകളില്‍ ഓറഞ്ച്‌ അലെര്‍ട്ടുണ്ട്‌. 19ന്‌ കണ്ണൂരും കാസര്‍ഗോട്ടും ഓറഞ്ച്‌ അലേര്‍ട്ട്‌ നല്‍കിയിട്ടുണ്ട്‌. ഇന്നു കോട്ടയം, ആലപ്പുഴ, എറണാകുളം, ഇടുക്കി ജില്ലകളിലും യെല്ലോ അലെര്‍ട്ടുണ്ട്‌.
മലയോരമേഖലകളില്‍ ഒറ്റപ്പെട്ട ശക്‌തമായ ഇടിയോടു കൂടിയ മഴയ്‌ക്കു സാധ്യതയുള്ളതിനാല്‍ കഴിഞ്ഞ ദിവസങ്ങളില്‍ ശക്‌തമായ മഴ ലഭിച്ച മലയോരപ്രദേശങ്ങളില്‍ ഓറഞ്ച്‌ അലെര്‍ട്ടിനു സമാനമായ ജാഗ്രത പാലിക്കണമെന്ന മുന്നറിയിപ്പുമുണ്ട്‌. കേരള-ലക്ഷദ്വീപ്‌-കര്‍ണാടക തീരങ്ങളില്‍ മണിക്കൂറില്‍ 40 മുതല്‍ 50 കിലോമീറ്റര്‍ വേഗത്തിലും ചില അവസരങ്ങളില്‍ മണിക്കൂറില്‍ 60 കിലോമീറ്റര്‍ വേഗത്തിലും ശക്‌തമായ കാറ്റിനു സാധ്യതയുണ്ടെന്ന്‌ കേന്ദ്ര കാലാവസ്‌ഥ വകുപ്പ്‌ അറിയിച്ചു. 21 വരെ മത്സ്യബന്ധനത്തിനു പോകാന്‍ പാടില്ല.
തെക്കന്‍ കര്‍ണാടകയ്‌ക്ക്‌ മുകളില്‍ നിലനില്‍ക്കുന്ന ചക്രവാതച്ചുഴിയുടെ സ്വാധീനത്തില്‍ അറബിക്കടലില്‍ പടിഞ്ഞാറന്‍ കാറ്റ്‌ ശക്‌തി പ്രാപിച്ചിട്ടുണ്ട്‌.
തെക്കന്‍ ആന്‍ഡമാന്‍ കടലിലും നിക്കോബര്‍ ദ്വീപ്‌ സമൂഹങ്ങളിലും തെക്ക്‌ കിഴക്കന്‍ ബംഗാള്‍ ഉള്‍കടലിലും കാലവര്‍ഷം എത്തിയതിന്റെ സൂചനയും കണ്ടു തുടങ്ങി.
