കൊച്ചി: കെട്ടിടനിര്‍മാണത്തിനുള്ള പെര്‍മിറ്റ് അനുവദിക്കുന്നതുമായി ബന്ധപ്പെട്ട കേസില്‍ ഹൈക്കോടതിയുടെ ഉത്തരവ് പാലിച്ചില്ലെന്നാരോപിച്ചുള്ള കോടതിയലക്ഷ്യ ഹര്‍ജിയില്‍ പത്തനംതിട്ട നഗരസഭാ സെക്രട്ടറി എസ്. ഷെര്‍ല ബീഗത്തെ അറസ്റ്റുചെയ്തു ഹൈക്കോടതിയില്‍ ഹാജരാക്കി.
ഹൈക്കോടതിയുടെ ഉത്തരവ് നടപ്പാക്കിയെന്ന് ഷെര്‍ലബീഗം അറിയിച്ചതിനെ തുടര്‍ന്ന് ജസ്റ്റീസ് പി.വി. കുഞ്ഞികൃഷ്ണന്‍ കോടതിയലക്ഷ്യ ഹര്‍ജിയിലെ തുടര്‍നടപടികള്‍ അവസാനിപ്പിച്ചു. ഹൈക്കോടതിയുടെ ഉത്തരവ് നടപ്പാക്കിയെന്ന് ഷെര്‍ല ബീഗം അറിയിച്ചപ്പോള്‍ കോടതിയുടെ ഉത്തരവുകളില്‍ എതിര്‍പ്പുണ്ടെങ്കില്‍ നിയമപരമായ മാര്‍ഗം തേടണമെന്നും ഉത്തരവു നടപ്പാക്കാതിരിക്കുകയല്ല വേണ്ടതെന്നും സിംഗിള്‍ബെഞ്ച് സെക്രട്ടറിയോടു പറഞ്ഞു.
ഇത്തരം നടപടികള്‍ ആവര്‍ത്തിക്കരുതെന്നു മുന്നറിയിപ്പും നല്‍കി. കോന്നി അട്ടച്ചാക്കല്‍ സ്വദേശിനി സുമ ദേവി, അസറ്റ് ഹോംസ് എംഡി വി. സുനില്‍ കുമാര്‍ എന്നിവര്‍ നല്‍കിയ കോടതിയലക്ഷ്യ ഹര്‍ജിയാണ് സിംഗിള്‍ബെഞ്ച് പരിഗണിച്ചത്.
