വാളയാര് കേസില് അഭിഭാഷകര് തമ്മില് വാക്പോര് തുടരുന്നു. സിബിഐ പ്രോസിക്യൂട്ടര്ക്കെതിരെ കുടുംബത്തിന്റെ അഭിഭാഷകന് രംഗത്തെത്തി. പ്രതികളുടെ നുണ പരിശോധന ഹര്ജി പണ്കുട്ടികളുടെ അമ്മ കോടതിയില് എതിര്ത്തു എന്നായിരുന്നു സിബിഐ പ്രോസിക്യൂട്ടറുടെ വാദം. ഇത് പച്ചക്കള്ളമെന്ന് അഡ്വക്കേറ്റ് രാജേഷ് എം മേനോന് ചൂണ്ടിക്കാട്ടി. ഹര്ജി പെണ്കുട്ടികളുടെ അമ്മ എതിര്ത്തെന്ന് തെളിയിച്ചാല് താന് വക്കീല് പണി അവസാനിപ്പിക്കാമെന്നും, അല്ലാത്തപക്ഷം സതീശന് പണി അവസാനിപ്പിക്കാന് തയ്യാറുണ്ടോ എന്നും രാജേഷ് എം മേനോന് വെല്ലുവിളിച്ചു.(Argument between advocates in Valayar pocso case)
പെണ്കുട്ടികളുടെ അമ്മ നുണപരിശോധനയെ എതിര്ത്തെന്ന് താന് പറഞ്ഞിട്ടില്ലെന്നും അവരുടെ അഭിഭാഷകന് കോടതിയില് നേരെ മറിച്ചാണ് വാദിച്ചതെന്നും കെപി സതീശന് പറഞ്ഞു. വാളയാര് കേസില് തൃശ്ശൂര് സ്വദേശിയായ അഭിഭാഷകന് സിബിഐ പ്രോസിക്യൂട്ടര് ആകുമെന്നും ഇക്കാര്യമാവശ്യപ്പെട്ട് സിബിഐ കത്തെഴുതിയതായും താനൊരിക്കലും വാളയാര് കേസില് പ്രോസിക്യൂട്ടര് ആകില്ലെന്നും കെ.പി.സതീശന് പറഞ്ഞു.