ചെറുപുഴ: ഡ്രൈവിങ് സ്‌കൂളില്‍ അതിക്രമിച്ചു കയറി ജീവനക്കാരിയെ കുത്തിപ്പരിക്കേല്പിച്ചു. ചെറുപുഴ അമ്പലം റോഡില്‍ പ്രവര്‍ത്തിക്കുന്ന മേരിമാതാ ഡ്രൈവിങ് സ്‌കൂളിലെ ജീവനക്കാരി ചെറുപുഴ ബാലവാടി റോഡിലെ സി.കെ. സിന്ധുവാണ് (39) ആക്രമണത്തിനിരയായത്. വെള്ളിയാഴ്ച ഉച്ച 1.40 ഓടെയായിരുന്നു സംഭവം.
യുവതിയുടെ തലക്കും പുറത്തും മൂര്‍ച്ചയേറിയ ആയുധം ഉപയോഗിച്ച് കുത്തിപ്പരിക്കേല്പിച്ചശേഷം ഓടി രക്ഷപ്പെട്ട ആക്രമിയെ പൊലീസ് പിന്തുടര്‍ന്നു പിടികൂടി. കന്യാകുമാരി സ്വദേശിയും ഇപ്പോള്‍ കര്‍ണാടകത്തില്‍ ടാപ്പിങ് തൊഴിലാളിയുമായ രാജന്‍ യേശുദാസിനെയാണ് (46) ചെറുപുഴ പാണ്ടിക്കടവ് ഭാഗത്തുനിന്ന് പൊലീസ് പിടികൂടിയത്. യുവതിയെ ആക്രമിച്ചശേഷം പുറത്തിറങ്ങി ഓടിയ ആക്രമിയെ സമീപത്തെ കടകളിലുണ്ടായിരുന്നവര്‍ പിന്തുടര്‍ന്നെങ്കിലും കണ്ടെത്താനായില്ല.
