കണ്ണൂർ: കെ റെയില്‍ ആശങ്ക പരിഹരിക്കണമെന്നു കണ്ണൂര്‍ ബിഷപ് ഡോ. അലക്‌സ് വടക്കുംതല. സിപിഎം പാര്‍ട്ടി കോണ്‍ഗ്രസ് വേദിയിലാണ് അദ്ദേഹം ഇക്കാര്യം പറഞ്ഞത്. കെ റെയിൽ സംബന്ധിച്ച കെസിബിസി നിലപാടില്‍ എല്ലാം വ്യക്തമാണെന്നും ബിഷപ് ചൂണ്ടിക്കാട്ടി.
കണ്ണൂരില്‍ നടക്കുന്ന സിപിഎം 23-ാം പാര്‍ട്ടി കോണ്‍ഗ്രസില്‍ പ്രത്യേകം ക്ഷണിതാവായാണ് ബിഷപ് എത്തിയത്. സിനിമാ താരങ്ങളായ ഹരിശ്രീ അശോകന്‍, മധുപാല്‍, ഗായിക സയനോര തുടങ്ങിയവരും ചടങ്ങില്‍ പ്രത്യേക ക്ഷണിതാക്കളായി സംബന്ധിക്കുന്നുണ്ട്.
കെ റെയിൽ നടപ്പാക്കുന്നതിനു മുന്പ് ജനങ്ങളുടെ ആശങ്ക പരിഹരിക്കണമെന്നു ദീപികയിൽ എഴുതിയ ലേഖനത്തിലൂടെ കെസിബിസി ആവശ്യപ്പെട്ടിരുന്നു. കെ റെയിലിനെതിരേ വൻ ബഹുജനപ്രക്ഷോഭം ശക്തമായ സാഹചര്യത്തിലായിരുന്നു കെസിബിസിയുടെ നിലപാട് വ്യക്തമാക്കൽ.
പദ്ധതിക്കു വേണ്ടി നേരത്തെ മോഹന വാഗ്ദാനങ്ങൾ നൽകി കുടിയിറക്കപ്പെട്ട പലരും പതിറ്റാണ്ടുകൾക്കു ശേഷവും വേണ്ടത്ര നഷ്ടപരിഹാരമോ പകരം സംവിധാനങ്ങളോ ലഭിക്കാതെ കഷ്ടപ്പെടുന്നതും കെസിബിസി ചൂണ്ടിക്കാട്ടിയിരുന്നു. ഈ നയമാണ് കണ്ണൂർ ബിഷപ് ഇപ്പോൾ സിപിഎമ്മിന്‍റെ പാർട്ടി കോൺഗ്രസ് വേദിയിൽ തന്നെ ചൂണ്ടിക്കാണിച്ചിരിക്കുന്നത്.
