ചാവക്കാട്: നഗരത്തിലെ പ്രമുഖ പോക്കറ്റടിക്കാരൻ പിടിയിൽ. സ്വകാര്യബസിൽ കയറി യാത്രക്കാരെ പോക്കറ്റടിക്കാൻ ശ്രമിക്കുന്നതിനിടെയാണ് യുവാവ് പിടിയിലായത്. മലപ്പുറം സ്വദേശി കുഞ്ഞിരിയകത്ത് ഫാറൂഖിനെയാണ് (40) പൊലീസ് അറസ്റ്റ് ചെയ്തത്. പൊന്നാനി-ചാവക്കാട് റൂട്ടിലോടുന്ന മിനി വെറ്റ് ബസിൽ ആണ് സംഭവം.
യാത്രക്കാരനെ പോക്കറ്റടിക്കാൻ ശ്രമിക്കുന്നതിനിടെ യാത്രക്കാരും ബസ് ജീവനക്കാരും ഇയാളെ പിടികൂടുകയായിരുന്നു. സ്വകാര്യബസുകളിൽ മോഷണം വ്യാപകമാകുന്ന വിവരം ലഭിച്ചതിനെത്തുടർന്ന്, ഗുരുവായൂർ എ.സി.പി കെ.ജി. സുരേഷിന്‍റെ നിർദ്ദേശപ്രകാരം ചാവക്കാട് എസ്.എച്ച്.ഒ വിപിൻ വേണുഗോപാലിന്‍റെ നേതൃത്വത്തിൽ സ്വകാര്യബസ് അസോസിയേഷനുമായി സഹകരിച്ച് രഹസ്യനിരീക്ഷണം നടത്തിവരുകയാണ്. അതിനിടെയാണ് തിങ്കളാഴ്ച പോക്കറ്റടി ശ്രമമുണ്ടായത്.
