തിരുവനന്തപുരം: തനിക്ക് കോവിഡ് ബാധിച്ചതായി മാധ്യമങ്ങളിലുടെ പ്രചരിക്കുന്നത് വ്യാജ വാര്ത്തയാണെന്ന് ആരോഗ്യമന്ത്രി വീണാ ജോര്ജ്. കഴിഞ്ഞ കുറച്ച് ദിവസങ്ങളിലായി പനിയുണ്ടായിരുന്നുവെന്നും രണ്ട് തവണ ആർടിപിസിആർ പരിശോധന നടത്തിയപ്പോഴും കോവിഡ് നെഗറ്റീവ് ആയിരുന്നു ഫലമെന്നും മന്ത്രി ഫേസ്ബുക്ക് പേജിൽ കുറിച്ചു.
കോവിഡ് പരിശോധന ഇന്നും നടത്തി. നെഗറ്റീവ് ആണ് ഫലം. ഡെങ്കിയും നെഗറ്റീവാണ്. വൈറൽ പനിയാണെന്നും വിശ്രമം വേണമെന്നും ഡോക്ടർമാർ നിർദേശിച്ചു. അനേകം പേർ നേരിട്ടും അല്ലാതെയും വിളിക്കുകയും രോഗവിവരം തിരക്കുകയും ചെയ്യുന്നുണ്ട്. എല്ലാവരുടെയും സ്നേഹത്തിനും കരുതലിനും മന്ത്രി നന്ദിയും അറിയിച്ചു.