ബസ്, ഓട്ടോ, ടാക്സി വാഹനങ്ങളുടെ പുതുക്കിയ നിരക്ക് നാളെ മുതല് നിലവില് വരില്ല. ഇതുസംബന്ധിച്ച സര്ക്കാര് ഉത്തരവ് ഇറങ്ങാന് വൈകുന്നതാണ് കാരണം. ഉത്തരവിറങ്ങാന് ഒരാഴ്ചയെങ്കിലുമെടുക്കുമെന്നാണ് സര്ക്കാര് വൃത്തങ്ങള് വ്യക്താമാക്കുന്നത്. ഫെയര് സ്റ്റേജ് ഉള്പ്പടെ നിശ്ചയിക്കണം. ഇതിന് ശേഷമെ ഉത്തരവിറങ്ങൂവെന്ന് ഗതാഗത വകുപ്പ് അറിയിച്ചു. ഓര്ഡിനറി ഫാസ്റ്റ് സൂപ്പര് ഫാസ്റ്റ് ബസുകളുടെ ഫയര് സ്റ്റേജുകള് പ്രത്യേകം നിശ്ചയിക്കണം. ഇടതുമുന്നണി അംഗീകരിച്ച നിരക്ക് വര്ധന അനുസരിച്ച് വകുപ്പ് ഫെയര് സ്റ്റേജ് നിശ്ചയിക്കാന് ഒരാഴ്ച എടുക്കുമെന്നാണ് സൂചന.
മിനിമം ബസ് യാത്രാ നിരക്ക് നിലവിലെ എട്ട് രൂപയില് നിന്ന് പത്ത് രൂപയായാണ് ഉയര്ത്തുന്നത്. മിനിമം ചാര്ജിന്റെ ദൂരം കഴിഞ്ഞാല് കിലോ മീറ്ററിന് ഒരു രൂപ വീതം കൂടും. വിദ്യാര്ത്ഥികളുടെ നിരക്ക് ഉയര്ത്തണമെന്ന ബസുടമകളുടെ ആവശ്യം ശക്തമാണെന്നും, ഇത് അന്യായമെന്നും ഗതാഗത മന്ത്രി കഴിഞ്ഞ ദിവസം പറഞ്ഞിരുന്നു. എന്നാല് ഇക്കാര്യം പരിശോധിക്കാന് കമ്മീഷനെ വയ്ക്കാനാണ് എല്ഡിഎഫ് യോഗത്തില് ഉണ്ടായ തീരുമാനം.
ഓട്ടോ ചാര്ജ് രണ്ട് കിലോമീറ്ററിന് 30 രൂപ വരെയാവും. കിലോമീറ്ററിന് 12 രൂപയില് നിന്ന് 15 രൂപയായി നിരക്ക് ഉയര്ത്തും. ടാക്സി നിരക്ക് 1500 സി സിക്ക് താഴെയുള്ള കാറുകള് മിനിമം നിരക്ക് 200 രൂപയും 1500 സിസിക്ക് മുകളില് 225 രൂപയുമായിരിക്കും. പുതുക്കിയ യാത്രനിരക്ക് അടിസ്ഥാനമാക്കിയുള്ള ഉത്തരവ് ഉടനെ ഇറക്കുമെന്നും ഇതോടെ പുതുക്കിയ യാത്രാനിരക്കുകള് നിലവില് വരുമെന്നും ഗതാഗത മന്ത്രി പറഞ്ഞിരുന്നു.