തിരുവനന്തപുരം: ലോ കോളജിലെ എസ്എഫ്ഐ അതിക്രമത്തിൽ പോലീസ് നടപടിയെടുക്കുന്നില്ലെന്ന് ആരോപിച്ച് മഹിളാ കോണ്ഗ്രസ് പ്രവർത്തകർ ഡിജിപി ഓഫീസിലേക്ക് നടത്തിയ മാർച്ചിൽ നേരിയ സംഘർഷം. സംസ്ഥാന അധ്യക്ഷ ജെബി മേത്തറുടെ നേതൃത്വത്തിൽ എത്തിയ പ്രതിഷേധക്കാരെ ആൽത്തറ ജംഗ്ഷനിൽ ബാരിക്കേഡ് നിരത്തി പോലീസ് തടഞ്ഞു.
തുടർന്ന് പ്രതിഷേധക്കാർ ബാരിക്കേഡിന് മുകളിൽ കയറി പ്രതിഷേധിച്ചു. പ്രതിഷേധക്കാരിൽ ചിലരെ പോലീസ് ബലമായി കസ്റ്റഡിയിലെടുക്കാൻ ശ്രമിച്ചതാണ് നേരിയ സംഘർഷത്തിനിടയാക്കിയത്.
ലോ കോളജിൽ കെഎസ്യു പ്രവർത്തകരെ ആക്രമിച്ച എസ്എഫ്ഐക്കാരെ പോലീസ് സഹായിക്കുകയാണെന്നും അറസ്റ്റ് ചെയ്യുന്നില്ലെന്നും ആരോപിച്ചായിരുന്നു മഹിളാ കോണ്ഗ്രസിന്റെ പ്രതിഷേധം.