ഗ്ലോബല്‍ മലയാളം സിനിമയുടെ ലഹരിവിരുദ്ധ പ്രചാരണ പരിപാടിയുടെ ഭാഗമായി ലഹരിക്കെതിരായ സന്ദേശം ഉള്‍പ്പെടുത്തിയ ഹ്രസ്വചിത്ര, ഡോക്യുമെന്ററി, പ്രസംഗ, കവിതാ മത്സരവും കേരളത്തിലെ 14 ജില്ലകളിലും ലഹരിവിരുദ്ധ ചലച്ചിത്രോത്സവവും സംഘടിപ്പിക്കുന്നു.

കേരളത്തിനകത്തും പുറത്തും വിദേശ രാജ്യങ്ങളിലേയും  മലയാളി വിദ്യാര്‍ഥികള്‍ക്കും, പൊതുജനങ്ങള്‍ക്കും മത്സരങ്ങളില്‍ പങ്കെടുക്കാം.

ലഹരി രഹിത കേരളം എന്ന വിഷയത്തില്‍ 5 മിനിറ്റില്‍ കവിയാത്ത മലയാളത്തിലുള്ള പ്രസംഗവും കവിതയും വിഡിയോ രൂപത്തില്‍ മത്സരത്തിന് അയയ്ക്കാം. ലഹരിവിരുദ്ധ സന്ദേശത്തിലുള്ളഹ്രസ്വ ചിത്ര-ഡോക്യുമെന്ററി മത്സരത്തിന്  3 മുതല്‍ 5 മിനിറ്റ് വരെ ദൈര്‍ഘ്യമുള്ള ചിത്രങ്ങളാണ് അയയ്ക്കേണ്ടത്. ഹ്രസ്വചിത്രവും ഡോക്യുമെന്ററിയും  പ്രസംഗവും കവിതയും നിങ്ങളുടെ  സ്വന്തം ഫോണിലോ, ക്യാമറയിലോ ചിത്രീകരിക്കാം.

ചലച്ചിത്ര -മാധ്യമ- ലഹരിവിരുദ്ധ – മനഃശാസ്ത്ര രംഗത്തെ പ്രമുഖര്‍ അടങ്ങിയ ജഡ്ജിങ് കമ്മിറ്റിയാണ് വിജയികളെ തിരഞ്ഞെടുക്കുന്നത്.

പ്രശസ്തി പത്രവും ഫലകവും കൂടാതെ  20, 000  രൂപ വീതം ഒന്നാം സമ്മാനവും  10,000 രൂപ വീതം രണ്ടാം സമ്മാനവും  5,000  രൂപ വീതം മൂന്നാം സമ്മാനവും ഹ്രസ്വചിത്രത്തിന്റേയും  ഡോക്യുമെന്ററിയുടെയും വിജയികള്‍ക്ക് ലഭിക്കുകയെന്ന് ഗ്ലോബല്‍ മലയാളം സിനിമ ചെയര്‍മാനും നടനും എഴുത്തുകാരനും  നിർമ്മാതാവും സംവിധായകനും 


ലോക റെക്കോര്‍ഡ് ജേതാവുമായ

ജോയ് കെ.മാത്യു പറഞ്ഞു.  പ്രസംഗം, കവിത എന്നിവയിലെ വിജയികള്‍ക്ക് ക്യാഷ് അവാര്‍ഡും പ്രശസ്തി പത്രവും ഫലകവും നല്‍കി ആദരിക്കും.

പ്രത്യേകം തിരഞ്ഞെടുക്കുന്ന  ഹ്രസ്വ ചിത്രങ്ങളും ഡോക്യുമെന്ററികളും പ്രസംഗങ്ങളും കവിതകളും ഗ്ലോബല്‍ മലയാളം സിനിമയുമായി ബന്ധപ്പെട്ട ചാനലുകളില്‍ പ്രദര്‍ശിപ്പിക്കും അവിടെ നിന്നും ഏറ്റവുമധികം പ്രേക്ഷക കമന്റ് കിട്ടുന്ന 25  പേര്‍ക്ക് പ്രത്യേക സമ്മാനം നല്‍കി ആദരിക്കും.

മത്സരത്തിന് അയയ്ക്കുന്ന ഹ്രസ്വചിത്രങ്ങളോ ഡോക്യുമെന്ററികളോ പ്രസംഗമോ കവിതകളോ മറ്റെവിടെയെങ്കിലും പ്രദര്‍ശിപ്പിച്ചതോ സോഷ്യല്‍ മീഡിയയില്‍ അപ്‌ലോഡ് ചെയ്തതോ യാതൊരുവിധ പകര്‍പ്പവകാശ ലംഘനവും നടത്തിയതോ ആയിരിക്കരുത്.
ഹ്രസ്വചിത്രങ്ങളും ഡോക്യുമെന്ററികളും പ്രസംഗ – കവിത വിഡിയോയും മെയ് 15 ന്  മുന്‍പായി [email protected]  എന്ന ഇ-മെയിലില്‍ MP4 അല്ലെങ്കില്‍ MOV ഫോര്‍മാറ്റില്‍ ലഭിച്ചിരിക്കണം.

ഈ വര്‍ഷം എറണാകുളത്ത് സംഘടിപ്പിക്കുന്ന ചടങ്ങില്‍ സമ്മാനത്തിനര്‍ഹരായവരുടെ ചിത്രം പ്രദര്‍ശിപ്പിക്കുകയും ചലച്ചിത്ര – മാധ്യമ – ലഹരിവിരുദ്ധ – മനഃശാസ്ത്ര രംഗത്തെ പ്രമുഖർ പങ്കെടുക്കുന്ന ചടങ്ങിൽ വച്ച് പുരസ്‌കാരം നല്‍കി ആദരിക്കുകയും ചെയ്യും. തിരഞ്ഞെടുക്കുന്ന ഹ്രസ്വചിത്രങ്ങളും ഡോക്യുമെന്ററികളും പ്രസംഗങ്ങളും കവിതകളും 14 ജില്ലകളിലും പ്രത്യേക പരിപാടികളോടെ സംഘടിപ്പിക്കുന്ന ലഹരിവിരുദ്ധ ചലച്ചിത്രോത്സവത്തില്‍  പ്രദര്‍ശിപ്പിക്കും. റജിസ്‌ട്രേഷനും കൂടുതല്‍ വിവരങ്ങള്‍ക്ക്, പ്രൊജക്റ്റ് കോ ഓര്‍ഡിനേറ്റേഴ്‌സ് : പി.ആര്‍.സുമേരന്‍ (9446190 254), ശശികുമാര്‍ എസ്.ഡി (99468 53016) എന്നിവരെ ബന്ധപ്പെടണം.