തിരുവനന്തപുരം: ഹൈക്കോടതി അഭിഭാഷകരുടെ നിയമനവുമായി ബന്ധപ്പെട്ട് ഭരണകക്ഷിക്കുള്ളിൽ അതൃപ്തി ശക്തമാകുന്നു. മുഖ്യമന്ത്രി ഏകപക്ഷീയമായാണ് നിയമനങ്ങൾ നടത്തുന്നതെന്നും മന്ത്രിമാരുടെ പോലും അറിവോ ചർച്ചയോ കൂടാതെയാണ് തീരുമാനങ്ങളെടുക്കുന്നതെന്നും പാർട്ടിക്കുള്ളിൽ വിമർശനം ഉയരുന്നുണ്ട്.
നിയമന നടപടികളിൽ പാർട്ടി പ്രവർത്തകരെയും അനുബന്ധ സംഘടനകളെയും അവഗണിക്കുന്നുവെന്ന ആരോപണവും ശക്തമാണ്. പ്രത്യേകിച്ച് ദേവസ്വം പ്ലീഡർ നിയമനം ഉൾപ്പെടെയുള്ള ചില തീരുമാനങ്ങൾ പാർട്ടി നേതൃത്വത്തിനുള്ളിൽ തന്നെ ചർച്ചകൾക്കും വിമർശനങ്ങൾക്കും ഇടയാക്കിയിട്ടുണ്ട്.
ഹൈക്കോടതി അഭിഭാഷക നിയമനങ്ങളിൽ പ്രതിഷേധവുമായി ലോയേഴ്സ് കോൺഗ്രസും രംഗത്തെത്തി. പാർട്ടിയുമായി ബന്ധമില്ലാത്തവരെ വിവിധ സ്ഥാനങ്ങളിലേക്ക് പരിഗണിക്കുന്നുവെന്നാരോപിച്ച് ലോയേഴ്സ് കോൺഗ്രസ് സംസ്ഥാന അധ്യക്ഷൻ പി.കെ. അബ്ദുറഹ്മാൻ കെപിസിസി നേതൃത്വത്തിന് പരാതി നൽകിയിട്ടുണ്ട്. കോൺഗ്രസ് അഭിഭാഷകർക്ക് വേണ്ടത്ര പരിഗണന ലഭിക്കുന്നില്ലെന്നും വ്യക്തിപരമായ താൽപര്യങ്ങളുടെ അടിസ്ഥാനത്തിലാണ് നിയമനങ്ങൾ നടക്കുന്നതെന്നും പരാതിയിൽ ചൂണ്ടിക്കാട്ടുന്നു.
ഇതിനിടെ, ഹൈക്കോടതി പ്ലീഡർ നിയമനങ്ങളിൽ മുസ്ലിം ലീഗും അതൃപ്തി അറിയിച്ചിട്ടുണ്ട്. വിവിധ ഒഴിവുകളിലേക്ക് നൽകിയ പട്ടികയിൽ നിന്ന് വളരെ കുറച്ച് പേരെ മാത്രമാണ് പരിഗണിച്ചതെന്നാണ് ലീഗ് നേതൃത്വത്തിന്റെ പരാതി. കൂടുതൽ പ്രാതിനിധ്യം നൽകണമെന്ന ആവശ്യം അവർ ഉന്നയിച്ചിട്ടുണ്ട്.
ശബരിമല സ്വർണക്കവർച്ച കേസുമായി ബന്ധപ്പെട്ട കമ്പനിയുടെ അഭിഭാഷകനായിരുന്ന കെ.ബി. പ്രദീപിനെ ദേവസ്വം സ്പെഷ്യൽ ഗവൺമെന്റ് പ്ലീഡറായി നിയമിച്ചതും പിന്നീട് രാജിവെച്ചതും വലിയ രാഷ്ട്രീയ വിവാദങ്ങൾക്ക് വഴിവെച്ചിരുന്നു. ഈ നിയമനവുമായി ബന്ധപ്പെട്ട് സർക്കാരിനും മുന്നണിക്കുള്ളിലും വിമർശനങ്ങൾ ഉയർന്നിരുന്നു.
ഹൈക്കോടതി അഭിഭാഷക നിയമനങ്ങളെ ചൊല്ലിയുള്ള പരാതികളും അതൃപ്തിയും ശക്തമാകുന്നതിനിടെ, വിഷയം ഭരണകക്ഷിക്കുള്ളിൽ കൂടുതൽ രാഷ്ട്രീയ ചർച്ചകൾക്ക് വഴിയൊരുക്കുകയാണ്.
English Summary:
Dissatisfaction is growing within the Congress-led government over High Court lawyer appointments. Critics allege that Chief Minister V. D. Satheesan is making appointments unilaterally without adequate consultation with ministers or party forums. Lawyers Congress has formally complained that party-affiliated advocates are being overlooked, while the Muslim League has also expressed dissatisfaction over limited representation in appointments. The controversy has intensified following debates surrounding the appointment and subsequent resignation of K.B. Pradeep as Devaswom Special Government Pleader.