കോട്ടയം: കോട്ടയം നഗരസഭയിലെ ജീവനക്കാരുടെ സേവനത്തിന് സന്തോഷ സൂചകമായി ലഡു നൽകി സലിമോൻ എന്നൊരാൾ. ജീവനക്കാർക്ക് ലഭിക്കേണ്ടിയിരുന്ന ഒരു സാധാരണമധുര പലഹാരമായിരുന്നില്ല അത്. മൂന്ന് ദിവസം കൊണ്ട് ലഭിക്കേണ്ടിയിരുന്ന ഒരു സേവനം 73 ദിവസത്തേക്ക് വൈകിപ്പിച്ചതിലുള്ള പ്രതിഷേധമാണ് ലഡു രൂപത്തിൽ ഒരു റിട്ടയേർഡ് ഉദ്യോഗസ്ഥൻ അവർക്ക് നൽകിയത്. സംഭവം അറിഞ്ഞതോടെ ലഡു കഴിച്ചവർപോലും ചമ്മി, കഴിക്കാത്തവർ തിരികെ നൽകി.
കോട്ടയം നഗരസഭാ ഓഫീസിലാണ് ഈ സാധാരണ പ്രതിഷേധം അരങ്ങേറിയത്. തദ്ദേശവകുപ്പ് മുൻ ജീവനക്കാരനായ ചിങ്ങവനം കരിമ്പിൽ സ്വദേശി സലിമോൻ ആണ് വേറിട്ട ഈ പ്രതിഷേധരീതിക്ക് പിന്നിൽ. സലിമോൻ തന്റെ മകളുടെ വിവാഹത്തിനായി ഫെബ്രുവരിയിൽ കോട്ടയം നഗരസഭാ ഹാൾ ബുക്ക് ചെയ്തിരുന്നു.
വിവാഹം ജൂലൈ 12-ന് കഴിഞ്ഞതിനുശേഷം, ബുക്കിംഗിനായി നൽകിയ പതിനായിരം രൂപ നിക്ഷേപത്തുക തിരികെ ലഭിക്കുന്നതിനായി ജൂലൈ 21-ന് അദ്ദേഹം അപേക്ഷ നൽകി. നിയമപരമായി ഒരാഴ്ചയ്ക്കുള്ളിൽ ലഭിക്കേണ്ട ഈ തുക പിന്നീട് 73 ദിവസമായിട്ടും തിരികെ ലഭിച്ചില്ല. പലതവണ നഗരസഭാ ഓഫീസിൽ കയറിയിറങ്ങിയെങ്കിലും ഉദ്യോഗസ്ഥർ ഓരോ കാരണങ്ങൾ പറഞ്ഞ് അദ്ദേഹത്തെ മടക്കി അയച്ചു. സെക്രട്ടറിയോട് ചോദിച്ചപ്പോൾ ‘ഒപ്പിട്ടുവിട്ടു, അവിടെ ചോദിക്കൂ’ എന്ന മറുപടിയാണ് ലഭിച്ചത്.
നീതി ലഭിക്കാൻ വൈകിയതോടെ, ഒടുവിൽ നിവൃത്തിയില്ലാതെ സലിമോൻ ഒക്ടോബർ 3-ന് തദ്ദേശവകുപ്പ് ജോയിന്റ് ഡയറക്ടർക്ക് പരാതി നൽകി. പരാതി നൽകിയതിന്റെ പിറ്റേന്ന് തന്നെ അതായത്, ഒക്ടോബർ 4-ന് വൈകുന്നേരത്തോടെ നിക്ഷേപത്തുക അദ്ദേഹത്തിന് തിരികെ ലഭിച്ചു.
താൻ അനുഭവിച്ച ദുരിതത്തിനും കാലതാമസത്തിനും കാരണക്കാരായ ജീവനക്കാരോടുള്ള പ്രതിഷേധം അറിയിക്കാൻ, കഴിഞ്ഞ തിങ്കളാഴ്ച അദ്ദേഹം ലഡുവുമായി നഗരസഭാ ഓഫീസിലെത്തി.
“ഒരു ലഡു എടുക്കൂ സർ… നിങ്ങൾ ചെയ്തുതന്ന സേവനത്തിന്റെ സന്തോഷത്തിൽ കൊണ്ടുവന്നതാണ്,” എന്നായിരുന്നു സലിമോൻ ജീവനക്കാരോട് പറഞ്ഞത്. സന്തോഷത്തോടെ ലഡു വാങ്ങിയ ഉദ്യോഗസ്ഥർ പെട്ടെന്നാണ് സലിമോന്റെ നെഞ്ചിൽ പതിപ്പിച്ച പോസ്റ്റർ ശ്രദ്ധിച്ചത്.
‘മൂന്നുദിവസംകൊണ്ട് ലഭിക്കേണ്ട സേവനം 73 ദിവസംകൊണ്ട് ചെയ്തുതന്ന കോട്ടയം മുനിസിപ്പാലിറ്റി സ്റ്റാഫിന് ലഡു വിതരണം ചെയ്യുന്നു, 73 ദിവസം ഓഫീസിൽ കയറ്റിയിറക്കിയതിന് നന്ദി’
കാര്യം മനസ്സിലാക്കിയതോടെ, ചില ജീവനക്കാർ ലഡു തിരിച്ചുനൽകി. എന്നാൽ, അതിനകം മധുരം കഴിച്ചുപോയ മറ്റ് ചിലർ, തങ്ങളുടെ നടപടിയിലെ വീഴ്ച മനസ്സിലാക്കി നാണക്കേടോടെ കസേരകളിൽ ഇരുന്നുപോയതായാണ് റിപ്പോർട്ട്.
