ഇന്ഡിഗോ വിമാനത്തിലെ പ്രതിഷേധത്തില് സിപിഐഎം കേന്ദ്ര കമ്മിറ്റിയംഗം ഇ.പി ജയരാജനെതിരെ അന്വേഷണം. ഇ പി ജയരാജനെതിരായ കേസ് എഴുതി തള്ളാനാവില്ലെന്ന് തിരുവനന്തപുരം ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതി വ്യക്തമാക്കി. യൂത്ത് കോണ്ഗ്രസ് പ്രവര്ത്തകരെ മര്ദിച്ചെന്നാണ് കേസ്. അന്വേഷിച്ച് റിപ്പോര്ട്ട് നല്കാനാണ് കോടതിയുടെ ഉത്തരവ്. പിണറായി വിജയന്റെ ഗണ്മാന് അനില്കുമാറും കേസില് പ്രതിയാണ്.
2022 ജൂണ് 19നാണ് കേസ്നാസ്പദമായ സംഭവം നടക്കുന്നത്. മുഖ്യമന്ത്രി പിണറായി വിജയന് യാത്ര ചെയ്യുകയായിരുന്ന ഇന്ഡിഗോ വിമാനത്തില് വച്ച് യൂത്ത് കോണ്ഗ്രസ് പ്രവര്ത്തകര് പ്രതിഷേധിക്കുകയായിരുന്നു. അന്ന് തങ്ങളെ ഇ പി ജയരാജന് കൈയേറ്റം ചെയ്തുവെന്ന് ആരോപിച്ച് യൂത്ത് കോണ്ഗ്രസ് പ്രവര്ത്തകരും പരാതി നല്കിയിരുന്നു. ഇതില് കഴിഞ്ഞ സര്ക്കാരിന്റെ അവസാന കാലത്ത് ഇ പി ജയരാജനെ പ്രതിചേര്ക്കാനാവില്ലെന്ന് പൊലീസ് റിപ്പോര്ട്ട് തയാറാക്കിയിരുന്നു. റിപ്പോര്ട്ട് കോടതിയില് സമര്പ്പിക്കുകയും ചെയ്തു. ഈ റിപ്പോര്ട്ടാണ് തള്ളിയത്. തുടരന്വേഷണം നടത്തണമെന്നാണ് നിര്ദേശം. വലിയതുറ പോലീസ് എസ്. എച്ച് ഒയക്കാണ് നിര്ദ്ദേശം.
