ന്യൂഡൽഹി: മെഡിക്കൽ പ്രവേശന പരീക്ഷയായ നീറ്റ് (NEET)യുടെ സുരക്ഷ ശക്തമാക്കുന്നതിന്റെ ഭാഗമായി ചോദ്യപേപ്പർ വിതരണം ചെയ്യാൻ ഇന്ത്യൻ വ്യോമസേനയെ രംഗത്തിറക്കാൻ നാഷണൽ ടെസ്റ്റിംഗ് ഏജൻസി (NTA) തീരുമാനിച്ചു. ജൂൺ 21-ന് നടക്കുന്ന പരീക്ഷയ്ക്കായുള്ള ചോദ്യപേപ്പറുകൾ രാജ്യത്തെ വിവിധ പരീക്ഷാ കേന്ദ്രങ്ങളിലേക്ക് വ്യോമസേനയുടെ സഹായത്തോടെ എത്തിക്കാനാണ് തീരുമാനം.
കഴിഞ്ഞ വർഷം ചോദ്യപേപ്പർ ചോർച്ച വിവാദത്തെ തുടർന്ന് പരീക്ഷ റദ്ദാക്കേണ്ട സാഹചര്യം ഉണ്ടായ പശ്ചാത്തലത്തിലാണ് ഇത്തവണ സുരക്ഷാ ക്രമീകരണങ്ങൾ ശക്തമാക്കിയിരിക്കുന്നത്. പരീക്ഷയുടെ വിശ്വാസ്യതയും സുതാര്യതയും ഉറപ്പാക്കുകയാണ് ലക്ഷ്യമെന്ന് എൻടിഎ വ്യക്തമാക്കി.
തെലങ്കാനയിൽ നടന്ന പരീക്ഷാ ഒരുക്കങ്ങളുടെ അവലോകന യോഗത്തിലാണ് പുതിയ സുരക്ഷാ സംവിധാനം സംബന്ധിച്ച തീരുമാനം പ്രഖ്യാപിച്ചത്. എൻടിഎ ഡയറക്ടർ ജനറൽ അഭിഷേക് സിംഗ് ഓൺലൈനായി യോഗത്തിൽ പങ്കെടുത്ത് പുതിയ ക്രമീകരണങ്ങൾ വിശദീകരിച്ചു.
രാജ്യത്തെ ഏറ്റവും പ്രധാനപ്പെട്ട പ്രവേശന പരീക്ഷകളിലൊന്നായ നീറ്റ് കുറ്റമറ്റ രീതിയിൽ നടത്താൻ എല്ലാ വകുപ്പുകളും ഏകോപനത്തോടെ പ്രവർത്തിക്കണമെന്ന് ചീഫ് സെക്രട്ടറി കെ. രാമകൃഷ്ണ റാവു നിർദേശം നൽകി. പരീക്ഷാദിനത്തിൽ വിദ്യാർത്ഥികൾക്ക് യാതൊരു ബുദ്ധിമുട്ടും ഉണ്ടാകാതിരിക്കാനുള്ള നടപടികളും ജില്ലാ ഭരണകൂടങ്ങൾക്ക് നിർദേശിച്ചിട്ടുണ്ട്.
ചോദ്യപേപ്പർ ചോർച്ചയുമായി ബന്ധപ്പെട്ട അഭ്യൂഹങ്ങൾ അടിസ്ഥാനരഹിതമാണെന്നും, വ്യാജവാർത്തകൾ പ്രചരിപ്പിക്കുന്നവർക്കെതിരെ കർശന നടപടി സ്വീകരിക്കുമെന്നും എൻടിഎ മുന്നറിയിപ്പ് നൽകി. സോഷ്യൽ മീഡിയ നിരീക്ഷണം ശക്തമാക്കി തെറ്റായ വിവരങ്ങൾക്ക് ഉടൻ മറുപടി നൽകുമെന്നും അധികൃതർ അറിയിച്ചു.
English Summary
The National Testing Agency (NTA) has decided to deploy the Indian Air Force to transport NEET question papers for the June 21 exam, marking a major step to enhance security following previous paper leak controversies. The move aims to ensure transparency and prevent any malpractice.