പത്തനംതിട്ടയിലെ തണ്ണിത്തോട്ടിൽ ഉണ്ടായ അതിശക്തമായ മഴയിലും കാറ്റിലും സ്കൂൾ കെട്ടിടത്തിന്റെ മേൽക്കൂര പറന്നുപോയി. തണ്ണിത്തോട് സെന്റ് ബെനഡിക്ട്സ് എം.എസ്.സി.എച്ച്.എസ്. സ്കൂളിന്റെ മേൽക്കൂരയാണ് ശക്തമായ കാറ്റിൽ തകർന്നത്. മേൽക്കൂരയുടെ ഭാഗങ്ങൾ സമീപത്തെ വീടിന് മുകളിലേക്ക് പതിച്ചതോടെ പ്രദേശത്ത് നാശനഷ്ടമുണ്ടായി.
കനത്ത മഴയും ശക്തമായ കാറ്റുമാണ് അപകടത്തിന് കാരണമായത്. സംഭവസമയത്ത് സ്കൂളിൽ പ്രവർത്തനമില്ലാതിരുന്നതിനാൽ വലിയ ദുരന്തം ഒഴിവായെന്നാണ് വിവരം. പ്രദേശത്ത് നിരവധി മരങ്ങൾ കടപുഴകുകയും വൈദ്യുതി വിതരണം തടസപ്പെടുകയും ചെയ്തു.
സംസ്ഥാനത്ത് അടുത്ത അഞ്ച് ദിവസവും ശക്തമായ മഴ തുടരുമെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകിയിട്ടുണ്ട്. ഇന്ന് പത്തനംതിട്ട, കോട്ടയം, ഇടുക്കി, എറണാകുളം, കോഴിക്കോട്, കണ്ണൂർ, കാസർകോട് ജില്ലകളിൽ ഓറഞ്ച് അലർട്ട് പ്രഖ്യാപിച്ചു.
ഒറ്റപ്പെട്ട പ്രദേശങ്ങളിൽ 24 മണിക്കൂറിനിടെ 115.6 മുതൽ 204.4 മില്ലിമീറ്റർ വരെ അതിശക്തമായ മഴ ലഭിക്കാനിടയുണ്ടെന്ന് മുന്നറിയിപ്പുണ്ട്. ഇടിമിന്നലോടുകൂടിയ മഴയ്ക്ക് സാധ്യതയുള്ളതിനാൽ പൊതുജനങ്ങൾ ജാഗ്രത പാലിക്കണമെന്ന് ദുരന്തനിവാരണ അതോറിറ്റി നിർദേശിച്ചു.