കോഴിക്കോട്: 2024 ലോക്സഭാ തെരഞ്ഞെടുപ്പ് കാലത്ത് വടകരയിൽ വലിയ രാഷ്ട്രീയ വിവാദത്തിന് വഴിവെച്ച ‘കാഫിർ’ സ്ക്രീൻഷോട്ട് പ്രചരിപ്പിച്ച കേസിൽ ഡിവൈഎഫ്ഐ നേതാവിനെ പ്രത്യേക അന്വേഷണ സംഘം (SIT) അറസ്റ്റ് ചെയ്തു. ഡിവൈഎഫ്ഐ വടകര ബ്ലോക്ക് കമ്മിറ്റി അംഗം ജിതിൻ ഭാസ്കറിനെയാണ് അന്വേഷണ സംഘം കസ്റ്റഡിയിലെടുത്തത്.
അന്വേഷണത്തിൽ ലഭിച്ച വിവരങ്ങൾ പ്രകാരം, വിവാദ സ്ക്രീൻഷോട്ട് ആദ്യം ജിതിൻ ഭാസ്കർ ‘വടകര സ്ക്വാഡ്’ എന്ന വാട്സ്ആപ്പ് ഗ്രൂപ്പിലും തുടർന്ന് ‘റിബേഷ് റെഡ് എൻകൗണ്ടർ’ ഗ്രൂപ്പിലും പങ്കുവെച്ചതായി കണ്ടെത്തിയിട്ടുണ്ട്. കേസുമായി ബന്ധപ്പെട്ട് ഡിവൈഎഫ്ഐ, സിപിഎം പ്രവർത്തകരുൾപ്പെടെ ഒമ്പത് പേരെ അന്വേഷണ സംഘം ചോദ്യം ചെയ്തതായും റിപ്പോർട്ടുണ്ട്.
2024 ലോക്സഭാ തെരഞ്ഞെടുപ്പിനിടെ യുഡിഎഫ് സ്ഥാനാർഥിയായിരുന്ന ഷാഫി പറമ്പിലിനെ ലക്ഷ്യമിട്ടാണ് ‘കാഫിർ’ സ്ക്രീൻഷോട്ട് വ്യാപകമായി പ്രചരിപ്പിക്കപ്പെട്ടത്. കേസിൽ ആദ്യം യൂത്ത് ലീഗ് പ്രവർത്തകൻ മുഹമ്മദ് കാസിമിനെ പ്രതിചേർത്തിരുന്നെങ്കിലും പിന്നീട് ഹൈക്കോടതിയുടെ ഇടപെടലിനെ തുടർന്നാണ് അന്വേഷണം പുതിയ ദിശയിൽ മുന്നോട്ടുപോയത്.
തുടർന്നുള്ള അന്വേഷണത്തിലാണ് ഡിവൈഎഫ്ഐ പ്രവർത്തകനായ റിബേഷ് രാമകൃഷ്ണനാണ് വിവാദ പോസ്റ്റ് ആദ്യം പങ്കുവെച്ചതെന്ന് കണ്ടെത്തിയത്. പിന്നീട് കൂടുതൽ തെളിവുകൾ ശേഖരിച്ച അന്വേഷണ സംഘം ജിതിൻ ഭാസ്കറിന്റെ പങ്കും കണ്ടെത്തുകയും അറസ്റ്റ് രേഖപ്പെടുത്തുകയും ചെയ്തു.
സംഭവവുമായി ബന്ധപ്പെട്ട കൂടുതൽ വ്യക്തികളിലേക്ക് അന്വേഷണം വ്യാപിപ്പിച്ചിട്ടുണ്ടെന്നും അന്വേഷണ സംഘം അറിയിച്ചു.
English Summary
DYFI Vadakara Block Committee member Jithin Bhaskar has been arrested by the Special Investigation Team (SIT) in connection with the controversial ‘Kafir’ screenshot case that surfaced during the 2024 Lok Sabha elections. Investigators found that the screenshot was circulated through WhatsApp groups linked to party workers. The case, which initially targeted UDF candidate Shafi Parambil, has seen renewed progress following High Court intervention and a detailed probe.