കൊച്ചി: സിഎംആർഎല്ലുമായി നടത്തിയ സാമ്പത്തിക ഇടപാടുകളുമായി ബന്ധപ്പെട്ട കേസിൽ എക്സാലോജിക് മാനേജിംഗ് ഡയറക്ടർ വീണ ടിക്ക് വീണ്ടും എൻഫോഴ്സ്മെന്റ് ഡയറക്ടറേറ്റ് (ഇഡി) സമൻസ് അയച്ചു. ബുധനാഴ്ച രാവിലെ 10.30ന് ഇഡി ഓഫീസിൽ ഹാജരാകണമെന്നാണ് പുതിയ നിർദേശം.
ഇന്ന് ഹാജരാകണമെന്ന് ആവശ്യപ്പെട്ട് നേരത്തെ ഇഡി സമൻസ് നൽകിയിരുന്നെങ്കിലും, അനാരോഗ്യം കാരണം ഹാജരാകാൻ ബുദ്ധിമുട്ടുണ്ടെന്ന് വീണ ടി അറിയിച്ചിരുന്നു. ഇതിനായി രണ്ടാഴ്ചത്തെ സാവകാശവും അവർ തേടിയിരുന്നു.
എന്നാൽ സാവകാശം അനുവദിക്കാതെ ബുധനാഴ്ച തന്നെ ഹാജരാകണമെന്നാവശ്യപ്പെട്ട് ഇഡി വീണ്ടും സമൻസ് അയച്ചിരിക്കുകയാണ്. കേസുമായി ബന്ധപ്പെട്ട സാമ്പത്തിക ഇടപാടുകളെ കുറിച്ച് കൂടുതൽ വിവരങ്ങൾ ശേഖരിക്കുന്നതിന്റെ ഭാഗമായാണ് ചോദ്യം ചെയ്യലിന് വിളിപ്പിച്ചിരിക്കുന്നതെന്നാണ് സൂചന.
സിഎംആർഎല്ലും എക്സാലോജിക്കും തമ്മിലുള്ള സാമ്പത്തിക ഇടപാടുകളുമായി ബന്ധപ്പെട്ട അന്വേഷണം ഇഡി തുടരുകയാണ്. കേസിലെ തുടർനടപടികൾ നിർണായകമാകുമെന്നാണ് വിലയിരുത്തൽ.