ഗൾഫ് മേഖലയിലെ നിലവിലെ സുരക്ഷാ സാഹചര്യങ്ങൾ പരിഗണിച്ച് നിർണായക തീരുമാനവുമായി സിബിഎസ്ഇ. നിരവധി ഇന്ത്യൻ വിദ്യാർത്ഥികൾ പഠിക്കുന്ന ഗൾഫ് രാജ്യങ്ങളിലെ പന്ത്രണ്ടാം ക്ലാസ് ബോർഡ് പരീക്ഷകൾ റദ്ദാക്കിയതായി അധികൃതർ അറിയിച്ചു. തീരുമാനം വിദ്യാർത്ഥികളിലും രക്ഷിതാക്കളിലും വലിയ ആശങ്കയ്ക്ക് ഇടയാക്കിയിട്ടുണ്ട്.
ബഹ്റൈൻ, ഇറാൻ, കുവൈത്ത്, ഒമാൻ, ഖത്തർ, സൗദി അറേബ്യ, യുഎഇ എന്നീ രാജ്യങ്ങളിലെ CBSE സ്കൂളുകളിൽ നടത്താനിരുന്ന പന്ത്രണ്ടാം ക്ലാസ് ബോർഡ് പരീക്ഷകളാണ് റദ്ദാക്കിയത്. ഞായറാഴ്ച പുറത്തിറക്കിയ ഔദ്യോഗിക സർക്കുലറിലാണ് ഇക്കാര്യം വ്യക്തമാക്കിയത്.
പ്രഖ്യാപനപ്രകാരം 2026 മാർച്ച് 16 മുതൽ ഏപ്രിൽ 10 വരെ നടത്താനിരുന്ന എല്ലാ പരീക്ഷകളും റദ്ദാക്കിയിട്ടുണ്ട്. നേരത്തെ മാറ്റിവെച്ചിരുന്ന പരീക്ഷകളും ഇനി നടത്തില്ലെന്ന് അധികൃതർ അറിയിച്ചു. മേഖലയിലെ സംഘർഷാവസ്ഥയും സുരക്ഷാ ആശങ്കകളും കണക്കിലെടുത്ത് സ്കൂളുകളിലും പ്രാദേശിക അധികാരികളിലും നിന്ന് ലഭിച്ച നിർദേശങ്ങൾ പരിഗണിച്ചാണ് ഈ തീരുമാനം എടുത്തതെന്ന് സി.ബി.എസ്.ഇ വ്യക്തമാക്കി.
ഇതിനൊപ്പം, നേരത്തെ മാറ്റിവെച്ചിരുന്ന പരീക്ഷകൾ വീണ്ടും നടത്തില്ലെന്നും ഈ വിദ്യാർത്ഥികളുടെ പരീക്ഷാഫലം സംബന്ധിച്ച അന്തിമ തീരുമാനം പിന്നീട് അറിയിക്കുമെന്നും പ്രസ്താവനയിൽ പറയുന്നു. അതേസമയം പത്താം ക്ലാസ് പരീക്ഷകൾ സിബിഎസ്ഇ നേരത്തെ തന്നെ റദ്ദാക്കിയിരുന്നു.
വിദ്യാർത്ഥികളുടെ മോഡൽ പരീക്ഷകളും ഇതിനുമുമ്പ് നടന്ന മറ്റ് മൂല്യനിർണയങ്ങളും അടിസ്ഥാനമാക്കിയായിരിക്കും പരീക്ഷാഫലം തീരുമാനിക്കാൻ സാധ്യതയെന്ന് വിദ്യാഭ്യാസ രംഗത്തുള്ളവർ സൂചിപ്പിക്കുന്നു. പന്ത്രണ്ടാം ക്ലാസ് പരീക്ഷാഫലം ഉയർന്ന വിദ്യാഭ്യാസ പ്രവേശനത്തിന് ഏറെ നിർണായകമായതിനാൽ പുതിയ തീരുമാനം വിദ്യാർത്ഥികളിലും രക്ഷിതാക്കളിലും ആശങ്ക ഉയർത്തിയിരിക്കുകയാണ്.
ഗൾഫ് മേഖലയിലെ സാഹചര്യങ്ങൾ സാധാരണ നിലയിലാകുന്നതുവരെ വിദ്യാർത്ഥികളുടെ സുരക്ഷ മുൻനിർത്തിയാണ് സി.ബി.എസ്.ഇ ഈ തീരുമാനം എടുത്തതെന്നാണ് വിലയിരുത്തൽ.