തൃശൂർ: രാമവർമപുരം പൊലീസ് അക്കാദമിയിൽ ചന്ദനമോഷണം നടന്നതായി റിപ്പോർട്ട്. അക്കാദമി ക്യാംപസിനുള്ളിലെ ലക്ഷങ്ങൾ വില വരുന്ന രണ്ട് ചന്ദനമരങ്ങളാണ് മോഷ്ടിച്ചത് എന്നാണ് ലഭിക്കുന്ന വിവരം. 30 വർഷത്തിലേറെ പഴക്കമുള്ള മരങ്ങളുടെ കാതലുള്ള ഭാഗങ്ങളാണ് മുറിച്ചു കടത്തിയത്.
അതേസമയം കനത്ത കാവലുള്ള അക്കാദമിയിൽ ഡിസംബർ 27 നും ജനുവരി രണ്ടിനും ഇടയിലാണ് മോഷണം നടന്നത്. അക്കാദമി എസ്റ്റേറ്റ് ഓഫീസറുടെ പരാതിയിൽ വിയ്യൂർ പൊലീസ് കേസെടുത്ത് അന്വേഷണം ആരംഭിച്ചു.
എന്നാൽ ഇതിന് പിന്നാലെ രാത്രികാലങ്ങളിൽ പ്രത്യേക പട്രോളിങ് ഏർപ്പെടുത്തണമെന്ന് ആവശ്യപ്പെട്ട് അക്കാദമി അഡ്മിനിസ്ട്രേഷൻ ഡിവൈഎസ്പി സർക്കുലർ പുറത്തിറക്കി. കർശന ജാഗ്രത വേണം എന്നാണ് സർക്കുലറിൽ പറയുന്നത്. രാജവൃക്ഷങ്ങൾ ഏറെയുള്ള അക്കാദമിയിൽ കർശന കാവൽ വേണം. രാത്രികാലങ്ങളിൽ പ്രത്യേക പെട്രോളിങ് ഏർപ്പെടുത്തണമെന്നും സർക്കുലറിൽ പറയുന്നു.