റിയാദ്: 25 വർഷമായി ബുറൈദയിൽ ജോലി ചെയ്തിരുന്ന മലയാളിയെ താമസസ്ഥലത്ത് മരിച്ച നിലയിൽ കണ്ടെത്തി. കൊല്ലം ചാത്തന്നൂർ മീനാട് ദേവ വിലാസത്തിൽ ജയദേവനാണ് (60) മരിച്ചത്. ജയദേവൻ ബുറൈദയിൽ എ.സി, റഫ്രിജറേറ്റർ മെക്കാനിക്കായി ജോലി ചെയ്തുവരികയായിരുന്നു.
ഇദ്ദേഹം ഒറ്റയ്ക്ക് താമസിച്ചിരുന്ന മുറിയിൽ നിന്നും പുറത്തിറങ്ങാതിരുന്നതോടെ നടത്തിയ അന്വേഷണത്തിലാണ് രണ്ട് ദിവസം പഴക്കമുള്ള മൃതദേഹം കണ്ടെത്തിയത്. തുടർന്ന് പോലീസും മെഡിക്കൽ സംഘവും സ്ഥലത്തെത്തി മൃതദേഹം ബുറൈദ സെൻട്രൽ ആശുപത്രി മോർച്ചറിയിലേക്ക് മാറ്റി. രണ്ട് വർഷം മുൻപാണ് നാട്ടിൽ നിന്നും ജയദേവൻ അവധി കഴിഞ്ഞ് മടങ്ങിയത്. നടപടിക്രമങ്ങൾ പൂർത്തിയാക്കി മൃതദേഹം നാട്ടിലെത്തിക്കാനുള്ള ശ്രമങ്ങൾ കനിവ് ജീവകാരുണ്യ കൂട്ടായ്മയുടെ ഭാരവാഹികൾ നടത്തുന്നുണ്ട്.