തിരുവനന്തപുരം : ഒടിടി രംഗത്ത് പുതുചരിത്രമെഴുതി കേരളത്തിന്റെ സ്വന്തം ഇന്റര്നെറ്റ് സംവിധാനമായ കെഫോൺ ഒടിടി ലോഞ്ച് ചെയ്തിരിക്കുന്നു. തിരുവനന്തപുരം നിശാഗന്ധി ഓഡിറ്റോറിയത്തിൽ നടന്ന ചടങ്ങിൽ മുഖ്യമന്ത്രി പിണറായി വിജയനാണ് കെഫോൺ ഒടിടി പ്ലാറ്റ്ഫോം ജനങ്ങൾക്കായി സമർപ്പിച്ചത്. കൂടുതല് ഉപഭോക്താക്കളെ ലക്ഷ്യമിട്ട് മറ്റ് ഇന്റര്നെറ്റ് സര്വീസ് പ്രൊവൈഡര്മാരോടു കിടപിടിക്കുന്ന സേവനം നല്കാനാണ് കെഫോൺ ലക്ഷ്യമിടുന്നത്. മറ്റ് സർവീസ് പ്രൊവൈഡർമാരെക്കാൾ സാധാരണക്കാർക്ക് താങ്ങാവുന്ന കുറഞ്ഞ നിരക്കിൽ ഒ.ടി.ടി. സേവനങ്ങൾ ജനങ്ങൾക്ക് എത്തിക്കുകയെന്നതാണ് കെഫോണിന്റെ പ്രധാന ലക്ഷ്യം. സൗകര്യങ്ങൾ കുറവായ പ്രദേശങ്ങളിലെ കുടുംബങ്ങൾക്കും ഇനി കെ-ഫോൺ ഒ.ടി.ടി മുഖേന സിനിമകളും കായിക പരിപാടികളും ആസ്വദിക്കാനാകും. സംസ്ഥാനത്തെ എല്ലാ കുടുംബങ്ങൾക്കും സമാനമായ വിനോദ-വിജ്ഞാന സൗകര്യം ഉറപ്പാക്കുകയാണ് പദ്ധതിയുടെ ഉദ്ദേശ്യം.
29 ഒടിടി പ്ലാറ്റ്ഫോമും 350ലധികം ഡിജിറ്റൽ ടിവി ചാനലുമടങ്ങുന്ന സേവനമാണ് കെ ഫോൺ പുതിയ പ്ലാറ്റ്ഫോമിലൂടെ നൽകുന്നത്. ആമസോണ് പ്രൈം ലൈറ്റ്, ജിയോ ഹോട്ട്സ്റ്റാര്, സോണി ലിവ്, സീ ഫൈവ്, ഫാന് കോഡ്, ഡിസ്കവറി പ്ലസ്, ഹംഗാമ ടിവി, പ്ലേ ബോക്സ് ടിവി തുടങ്ങിയ ഒടിടികൾ കെ ഫോണ് വഴി ഉപഭോക്താക്കള്ക്ക് ലഭിക്കും.
വിപണിയിലെ ഏറ്റവും കുറഞ്ഞ നിരക്കിലുള്ള ഹൈസ്പീഡ് ഇന്റര്നെറ്റ് പ്ലാനുകള്ക്ക് പുറമേ അധിക നേട്ടങ്ങളും ഉപഭോക്താക്കള്ക്കായി കെ ഫോണ് വാഗ്ദാനം ചെയ്യുന്നുണ്ട്. പുതുതായെത്തുന്ന ഉപഭോക്താക്കള്ക്ക് ആദ്യ ടേം റീച്ചാര്ജിനൊപ്പം അഡീഷണല് വാലിഡിറ്റി കൂടാതെ ബോണസ് വാലിഡിറ്റി കൂടി ലഭിക്കും. ഏപ്രില് 10 മുതല് നിലവില് വന്ന ഓഫറുകള് എല്ലാ പുതിയ ഉപഭോക്താക്കള്ക്കും ലഭ്യമാകും. മാത്രമല്ല ഉദ്ഘാടനത്തോടനുബന്ധിച്ച് ഉപഭോക്താക്കള്ക്കായി വിവിധ ഓഫറുകളും കെഫോണ് ഒരുക്കിയിട്ടുണ്ട്. 444 രൂപ മുതലുള്ള വിവിധ പാക്കേജുകള് ഉപഭോക്താക്കള്ക്ക് ഉപയോഗപ്പെടുത്താം. സ്റ്റാര്, വൈബ്, വൈബ് പ്ലസ്, അമേസ്, അമേസ് പ്ലസ് എന്നിങ്ങനെ അഞ്ചു പാക്കേജുകളാണ് ഒ.ടി.ടിക്കായി തയാറാക്കിയിരിക്കുന്നത്. ഇവയെല്ലാംതന്നെ ഒരു മാസത്തേക്കും മൂന്ന് മാസത്തേക്കും ആറ് മാസത്തേക്കും ഒരു വര്ഷത്തേക്കും എന്നിങ്ങനെയുള്ള വിവിധ പാക്കേജുകളായും ലഭ്യമാക്കിയിട്ടുണ്ട്. ഇത്തരത്തിലുള്ള സമഗ്ര പദ്ധതികളെയും തുടർ വികസന ഉദ്ദേശ്യങ്ങളെയും മുൻനിർത്തിയാണ് കെഫോണിൻ്റെ പ്രവർത്തനം മുന്നോട്ട് കൊണ്ടുപോകുന്നത്.
വികസന പദ്ധതികളെ തകർക്കാൻ ശ്രമിക്കുന്നവരുടെ സ്ഥാപിത താൽപര്യങ്ങളെയും പ്രതിഷേധങ്ങളെയും വകവെക്കാതെ സർക്കാർ മുന്നോട്ട് പോകുമെന്ന് മുഖ്യമന്ത്രി പിണറായി വിജയൻ ഉദ്ഘാടനം വേളയിൽ വ്യക്തമാക്കി. കെ-ഫോൺ പദ്ധതി എവിടെയും എത്തില്ലെന്നു പറഞ്ഞ് വെല്ലുവിളിക്കുകയും, ആക്ഷേപങ്ങളുയർത്തുകയും ചെയ്തവരുടെ മുന്നിൽ അഭിമാനാർഹമായ വളർച്ച കൈവരിച്ചാണ് കെ-ഫോൺ ഇന്ന് മുന്നേറുന്നത്.പദ്ധതി യാഥാർത്ഥ്യമാക്കിയപ്പോൾ മുന്നോട്ട് പോകില്ല എന്ന് പറഞ്ഞു. വിജയകരമായി മുന്നേറുമ്പോൾ വ്യാജാരോപണങ്ങളുമായി മറ്റുചിലർ രംഗത്തെത്തി. ചിലർ പദ്ധതിക്കെതിരേ ഹൈക്കോടതിയെ പോലും സമീപിച്ചു. അങ്ങനെ ജൈത്രയാത്രയിലെ അനവധി വെല്ലുവിളികളെ മറികടന്നാണ്, കെ-ഫോൺ ഒ.ടി.ടി. എന്ന സ്വപ്നം ഇന്ന് യാഥാർത്ഥ്യമായിരിക്കുന്നത്.
ഐപിടിവി, വിഎന്ഒ ലൈസന്സ് തുടങ്ങിയവയാണ് കെഫോണിന്റെ അടുത്തഘട്ട നടപടികള്. ഇതിന് പുറമേ സംസ്ഥാനത്തിന് പുറത്ത് ഇന്റര്നെറ്റ് നല്കുന്നതിനായുള്ള ഐഎസ്പി എ ലൈസന്സും കെഫോണ് നേടിക്കഴിഞ്ഞു. സാര്വ്വത്രിക ഇന്റര്നെറ്റ് എന്ന ലക്ഷ്യം മുന്നിര്ത്തി ഇന്റര്നെറ്റ് മൗലിക അവകാശമായി പ്രഖ്യാപിച്ച രാജ്യത്തെ ആദ്യ സംസ്ഥാനമാണ് കേരളം. സേവനങ്ങള് ആരംഭിച്ച് ഒരു വര്ഷം പിന്നിടുമ്പോള് ഒരു ലക്ഷം കണക്ഷനുകളെന്ന അഭിമാന നേട്ടവും രാജ്യത്തെവിടെയും ഇന്റര്നെറ്റ് കണക്ഷന് നല്കാനുള്ള ഐ.എസ്.പി എ ലൈസന്സും നേടിയാണ് കെഫോണിന്റെ വളര്ച്ച.
ആകെ 1,16,234 കണക്ഷനുകളാണ് കെഫോണ് സംസ്ഥാനത്തുടനീളം നല്കിയിരിക്കുന്നത്. ഇതിനോടകം 23,163 സര്ക്കാര് ഓഫീസുകളില് കണക്ഷനുകള് നല്കിക്കഴിഞ്ഞു. ഫൈബര് ടു ഓഫീസ് കണക്ഷനുകള് 3079 ആണ്. കൊമേഴ്സ്യല് എഫ്.ടി.ടി.എച്ച് കണക്ഷനുകള് 75773 എണ്ണവും സാമ്പത്തിക ബുദ്ധിമുട്ട് അനുഭവിക്കുന്ന 14194 കുടുംബങ്ങളില് സൗജന്യ കണക്ഷനുകളും ലൈവായി ഉപയോഗിക്കുന്നുണ്ട്. ഏകദേശം 7,000 കിലോ മീറ്റര് ഇപ്പോള്ത്തന്നെ ഡാര്ക്ക് ഫൈബര് ലീസിന് നല്കിക്കഴിഞ്ഞു. കോര്പ്പറേറ്റ് സ്ഥാപനങ്ങള്ക്കും, സ്മോള് & മീഡിയം എന്റര്പ്രൈസസുകള്ക്കുമായി 220 ഇന്റര്നെറ്റ് ലീസ് ലൈന് കണക്ഷനുകളും 265 എസ്.എം.ഇ ബ്രോഡ്ബാന്ഡ് കണക്ഷനുകളും നിലവിലുണ്ട്. 3,800 ലോക്കല് നെറ്റുവര്ക്ക് പ്രൊവൈഡര്മാരാണ് കെഫോണുമായി എഗ്രിമെന്റിലേര്പ്പെട്ട് പ്രവര്ത്തിക്കുന്നത്.
നഗര കേന്ദ്രീകൃതമായി വന് കോര്പ്പറേറ്റ് സ്ഥാപനങ്ങള് ഇന്റര്നെറ്റ് കണക്ഷനുകള് വ്യാപിപ്പിക്കുമ്പോള് നഗരങ്ങള്ക്കൊപ്പം ഗ്രാമപ്രദേശങ്ങളും ഇന്റര്നെറ്റ് സാക്ഷരതയുടെ പരിധിയില് വരണമെന്ന ഉദ്ദേശത്തോടെയാണ് കെഫോണ് നഗരങ്ങളിലും ഗ്രാമങ്ങളിലും ഒരുപോലെ സേവനം നല്കുന്നത്. ഇന്റര്നെറ്റ് കടന്നുചെല്ലാത്ത ആദിവാസി ഊരുകളിലും ദ്വീപ് പ്രദേശങ്ങളിലും കെഫോണ് കണക്ഷന് നല്കുന്നുണ്ട്. ഗ്രാമപ്രദേശങ്ങളില് കൂടുതല് കണക്ഷന് നല്കിയാണ് നിലവില് കെഫോണിന്റെ കുതിപ്പ്.
റൂറല് ഏരിയ എന്ന് തരംതിരിക്കാനാവത്തവിധം അര്ബന്-റൂറല് സ്വഭാവത്തോടെയാണ് കേരളത്തിലെ സ്ഥലങ്ങളുള്ളത്. വളരെയേറെ ജനസാന്ദ്രതയുള്ള പ്രദേശങ്ങളാണ് സംസ്ഥാനത്ത് ഭൂരിഭാഗവും. അതിന് ആനുപാതികമായി കെഫോണ് നെറ്റുവര്ക്കും എല്ലായിടത്തേക്കും വ്യാപിച്ചിട്ടുണ്ട്. ഗ്രാമ-നഗര വ്യത്യാസമില്ലാതെ എല്ലായിടത്തും ഇന്റര്നെറ്റ് എത്തിക്കാന് കെഫോണിന് സാധിക്കും. ഇതിന് വേണ്ട
വളരെ വിപുലമായ നെറ്റ്വർക്ക് സംവിധാനങ്ങള് കെഫോണിനുണ്ട്. മറ്റ് ഐസ്പികളുമായി താരതമ്യം ചെയ്യുമ്പോള് കേരളത്തിലെ ഏറ്റവും വലിയ നെറ്റുവര്ക്കാണ് കെഫോണിന്റേത്. 31153 കിലോ മീറ്ററുകള് ഫൈബര് ഒപ്റ്റിക് കേബിള് പൂര്ത്തീകരിച്ച് കെഫോണ് നിലവില് പൂര്ണസജ്ജമാണ്. ഐഎസ്പി ലൈസന്സും ഒപ്പം ഐപി ഇന്ഫ്രസ്ട്രക്ചര് ലൈസന്സും എന്എല്ഡി (നാഷണല് ലോങ്ങ് ഡിസ്റ്റന്സ്സ്) ലൈസന്സും കെ ഫോണിന് സ്വന്തമാണ്. കൊച്ചി ഇന്ഫോപാര്ക്കില് സജ്ജമാക്കിയ നെറ്റുവര്ക്ക് ഓപ്പറേറ്റിങ്ങ് സെന്ററാണ് കെഫോണിന്റെ തലച്ചോര്. ഇവിടെ നിന്നും 375 കെ.എസ്.ഇ.ബി സബ് സ്റ്റേഷനുകളിലായുള്ള പോയിന്റ് ഓഫ് പ്രസന്സ് (POP) കേന്ദ്രങ്ങള് വഴിയാണ് കേരളത്തിലുടനീളമുള്ള വിവിധ സ്ഥാപനങ്ങളിലേക്കും വീടുകളിലേക്കും ഇന്റര്നെറ്റ് ലഭ്യമാകുന്നത്. നെറ്റുവര്ക്ക് ഓപ്പറേറ്റിംഗ് സെന്ററില് (NOC) നിന്ന് 14 കോര് പോപ്പ് കേന്ദ്രങ്ങളിലേക്കും അവിടെ നിന്ന് 94 റിങ്ങ് അഗ്രിഗേഷന് നെറ്റുവര്ക്ക് വഴി 186 പ്രീ അഗ്രിഗേഷന് റിങ്ങ് നെറ്റുവര്ക്കിലേക്കും അവിടെ നിന്ന് 81 സ്പര് കേബിള് കണക്ഷന് കേന്ദ്രങ്ങളിലേക്കും വിന്യസിച്ചിരുക്കുന്ന വിപുലമായ നെറ്റുവര്ക്ക് സിസ്റ്റം വഴിയാണ് കെഫോണ് ഇന്റര്നെറ്റ് സേവനങ്ങള് നല്കുന്നത്. ഈ നെറ്റുവര്ക്കിന്റെ സാധ്യതകളെല്ലാം പരമാവധി പ്രയോജനപ്പെടുത്തുന്നതിനുള്ള പ്രവര്ത്തനങ്ങള് കെ ഫോണ് നടത്തുന്നുണ്ട്.
ദേശീയപാതാ വികസനവുമായി ബന്ധപ്പെട്ട പ്രവര്ത്തനങ്ങള് നടന്നുവരുന്നതിനാല് നെറ്റ്വർക്ക് സജ്ജീകരണത്തില് ചെറിയൊരു വേഗതക്കുറവുണ്ടെങ്കില്പ്പോലും ഇതിനോടകം 23,163 സര്ക്കാര് ഓഫീസുകളില് കെഫോണ് കണക്ഷനുകള് നല്കിക്കഴിഞ്ഞു. ഇനിയും ബാക്കിയുള്ള സര്ക്കാര് സ്ഥാപനങ്ങളില് കണക്ഷന് നല്കുന്നതിനുള്ള പ്രവര്ത്തനങ്ങള് പുരോഗമിച്ചുവരികയാണ്. ഫൈബര് ടു ഓഫീസ് കണക്ഷനുകള് 3062 ആണ്. കൊമേഴ്സ്യല് എഫ്.ടി.ടി.എച്ച് കണക്ഷനുകള് 74717 എണ്ണവും സാമ്പത്തിക ബുദ്ധിമുട്ട് അനുഭവിക്കുന്ന 14194 കുടുംബങ്ങളില് സൗജന്യ കണക്ഷനുകളും ലൈവായി ഉപയോഗിക്കുന്നുണ്ട്.
ഡാര്ക് ഫൈബര്, ഫൈബര് ടു ദ ഹോം, ഇന്റര്നെറ്റ് ലീസ് ലൈന് എന്നിങ്ങനെയുള്ള മോണിറ്റൈസേഷന് പ്രവര്ത്തനങ്ങളും കെ ഫോണ് പ്രൊജക്ടില് ഉള്പ്പെടുന്നു. ഏകദേശം 7,000 കിലോ മീറ്റര് ഇപ്പോള്ത്തന്നെ ഡാര്ക്ക് ഫൈബര് ലീസിന് നല്കിക്കഴിഞ്ഞു. വിവിധ മുന്നിര ഇന്റര്നെറ്റ് സേവനദാതാക്കളും ഇക്കാര്യത്തില് കെഫോണിനെ സമീപിക്കുന്നുണ്ട്. ഇതിന് പുറമേ കോര്പ്പറേറ്റ് സ്ഥാപനങ്ങള്ക്കും, സ്മോള് & മീഡിയം എന്റര്പ്രൈസസുകള്ക്കുമായി 220 ഇന്റര്നെറ്റ് ലീസ് ലൈന് കണക്ഷനുകളും 265 എസ്.എം.ഇ ബ്രോഡ്ബാന്ഡ് കണക്ഷനുകളും നിലവിലുണ്ട്. ഏഴായിരത്തോളം കിലോമീറ്റര് ഡാര്ക്ക് ഫൈബര് വാണിജ്യ അടിസ്ഥാനത്തില് പത്ത് ഉപഭോക്താക്കള്ക്കായി നല്കിയിട്ടുണ്ട്. ആകെ 115161 സബ്സ്ക്രൈബേഴ്സാണ് കെഫോണിന് ഉള്ളത്. 3,800 ലോക്കല് നെറ്റുവര്ക്ക് പ്രൊവൈഡര്മാരാണ് കെഫോണുമായി എഗ്രിമെന്റിലേര്പ്പെട്ട് പ്രവര്ത്തിക്കുന്നത്.
കഴിഞ്ഞ ഒന്നര വർഷത്തോളമായി സെക്രട്ടേറിയേറ്റിലെ എല്ലാ ഓഫീസുകളും, 2024 ജൂൺ മുതൽ നിയമസഭയും കെ-ഫോൺ കണക്ഷനാണ് ഉപയോഗിക്കുന്നത്. വിവിധ സർക്കാർ വകുപ്പുകളോടൊപ്പം സംസ്ഥാനത്തെ ആരോഗ്യ, വിദ്യാഭ്യാസ, വ്യവസായ, ധനകാര്യ മേഖലകളിലെ മുൻനിര സ്ഥാപനങ്ങൾക്കും സ്റ്റാർട്ട്അപ്പുകൾക്കുമെല്ലാം മികച്ച സേവനമാണ് കെ-ഫോൺ നൽകിക്കൊണ്ടിരിക്കുന്നത്. അടുത്ത വർഷത്തോടെ രണ്ടര ലക്ഷത്തിലധികം കണക്ഷനുകൾ പൂർത്തിയാക്കുകയെന്ന ലക്ഷ്യത്തോടെ കെഫോൺ പ്രവർത്തനം ശക്തമായി മുന്നേറുകയാണ്.
സംസ്ഥാനത്തെ സാമ്പത്തിക ബുദ്ധിമുട്ട് അനുഭവിക്കുന്ന കുടുംബങ്ങൾക്ക് കെ-ഫോൺ മുഖേന സൗജന്യ ഇന്റർനെറ്റ് കണക്ഷനുകൾ സർക്കാർ നൽകിവരുന്നു. കൂടാതെ, കമ്പനികളുടെ സിഎസ്ആർ ഫണ്ടുകൾ വിനിയോഗിച്ച് ‘കണക്റ്റിംഗ് ദ അൺകണക്റ്റഡ്പദ്ധതിയിലൂടെ ആദിവാസി മേഖലകളിലും സേവനം വ്യാപിപ്പിച്ചിരിക്കുകയാണ്. ഈ പദ്ധതിയുടെ ഭാഗമായി, കോട്ടൂരിലെ 103 കുടുംബങ്ങൾക്കും അട്ടപ്പാടിയിലെ 396 കുടുംബങ്ങൾക്കും ഇതിനകം കണക്ഷൻ നൽകി. വീടുകൾക്ക് പുറമേ, അട്ടപ്പാടിയിലെ പുതൂർ പഞ്ചായത്തിലെ 50 ആംഗൻവാടികൾക്കും കെ-ഫോൺ സേവനം ലഭ്യമാക്കി. പഞ്ചായത്തുകളുടെ സഹകരണത്തോടെയാണ് പദ്ധതി മുന്നോട്ട് കൊണ്ടുപോകുന്നത്. സംസ്ഥാനത്തെ മറ്റ് ആദിവാസി മേഖലകളിലും ഇത്തരത്തിൽ കണക്ഷനുകൾ നൽകിക്കൊണ്ട് “എല്ലാവർക്കും ഇന്റർനെറ്റ്” എന്ന ലക്ഷ്യം യാഥാർത്ഥ്യമാക്കുകയാണ് ശ്രമം.വാഹന ഗതാഗതം പോലും വെല്ലുവിളിയാകുന്ന എറണാകുളം ജില്ലയിലെ വളന്തക്കാട് ദ്വീപിലും കെ-ഫോൺ ബിപിഎൽ കണക്ഷനുകൾ നൽകി വരുന്നു. കേരളത്തിന്റെ ഡിജിറ്റലൈസേഷൻ പ്രവർത്തനങ്ങളുടെ നെടുംതൂണായ കെ-ഫോൺ, ഇത്തരം പദ്ധതികളിലൂടെ സംസ്ഥാനത്തിന്റെ ഐ.ടി. ഇൻഫ്രാസ്ട്രക്ചർ വളർച്ചയും ലക്ഷ്യമിടുന്നു.ഇന്റർനെറ്റ് കടന്നുചെല്ലാൻ പ്രയാസമുള്ള പ്രദേശങ്ങളിൽ ഫൈബർ വിന്യസിക്കുന്നതിലൂടെ, സമീപ പ്രദേശങ്ങളിലേക്കും വിശ്വസനീയമായ ഇന്റർനെറ്റ് സേവനങ്ങൾ എത്തിക്കുന്നു. കെ-ഫോൺ കണക്ഷനുകൾക്കുപുറമെ, മറ്റ് സർവീസ് പ്രൊവൈഡർമാർക്കും ഈ ഫൈബർ ലീസ് ചെയ്ത് സേവനങ്ങൾ നൽകാൻ കഴിയുന്നതാണ്.
കെഫോണ് ഒ.ടി.ടി പാക്കേജ്
സ്റ്റാര് എന്ന പേരില് ഒരുക്കിയിരിക്കുന്ന 444 രൂപയുടെ ഏറ്റവും കുറഞ്ഞ ഒരു മാസ പാക്കേജില് 4500 ജിബി ഡാറ്റാ ലിമിറ്റില് 45 എംബിപിഎസ് വേഗതയിലുള്ള ഇന്റര്നെറ്റും 23 ഒ.ടി.ടികളും 350ലധികം ഡിജിറ്റല് ചാനലുകളുമാണ് ലഭ്യമാകുക. ഈ പാക്കേജ് മൂന്ന് മാസത്തേക്ക് 1265 രൂപയ്ക്കും ആറ് മാസത്തേക്ക് 2398 രൂപയ്ക്കും ഒരു വര്ഷത്തേക്ക് 4529 രൂപയ്ക്കും ലഭ്യമാകും. വൈബ് എന്ന പേരില് ഒരുക്കിയിരിക്കുന്ന 599 രൂപയുടെ ഒരു മാസ പാക്കേജില് 26 ഒ.ടി.ടികളും 350ലധികം ഡിജിറ്റല് ചാനലുകളുമാണ് ലഭ്യമാകുക. 55 എംബിപിഎസ് വേഗതയില് 4500 ജിബി ഇന്റര്നെറ്റും ലഭ്യമാകും. മൂന്ന് മാസത്തേക്ക് 1707 രൂപയും ആറ് മാസത്തേക്ക് 3235 രൂപയും ഒരു വര്ഷത്തേക്ക് 6110 രൂപയും നല്കി ഈ സേവനം ആസ്വദിക്കാം. 799 രൂപയുടെ വൈബ് പ്ലസ് ഒരു മാസ പാക്കേജില് വൈബിലേതുപോലെത്തന്നെ 26 ഒ.ടി.ടികളും 350ലധികം ഡിജിറ്റല് ചാനലുകളും ലഭ്യമാകും. എന്നാല് ഡാറ്റാ സ്പീജ് 105 എംബിപിഎസ് ആയി ഉയരും. 4500 ജിബിയാണ് ഡേറ്റ ലിമിറ്റ്. ഈ പാക്കേജ് മൂന്ന് മാസത്തേക്ക് 2277 രൂപയ്ക്കും ആറ് മാസത്തേക്ക് 4315 രൂപയ്ക്കും ഒരു വര്ഷത്തേക്ക് 8150 രൂപയ്ക്കും ലഭ്യമാകും. മാസം 899 രൂപയ്ക്ക് ലഭിക്കുന്ന അമേസ് എന്ന പാക്കേജില് 65 എംബിപിഎസ് വേഗതയില് 4500 ജിബി വരെ ഇന്റര്നെറ്റും ഒപ്പം 29 ഒ.ടി.ടികളും 350ലധികം ഡിജിറ്റല് ചാനലുകളും ലഭ്യമാകും. ഈ പാക്കേജിന്റെ മൂന്ന് മാസത്തേക്കുള്ള തുക 2562 രൂപയാണ്. ആറ് മാസത്തേക്ക് 4855 രൂപയ്ക്കും ഒരു വര്ഷത്തേക്ക് 9170 രൂപയ്ക്കും ഈ പാക്കേജ് ആസ്വദിക്കാം. 999 രൂപയുടെ അമേസ് പ്ലസ് ഒരു മാസ പാക്കേജില് 155 എംബിപിഎസ് വേഗതയില് 4500 ജിബി വരെ ഇന്റര്നെറ്റും ഒപ്പം 29 ഒ.ടി.ടികളും 350ലധികം ഡിജിറ്റല് ചാനലുകളും ലഭ്യമാകും. ഈ പാക്കേജ് 2847 രൂപയ്ക്ക് മൂന്ന് മാസത്തേക്കും 5395 രൂപയ്ക്ക് ആറു മാസത്തേക്കും 10190 രൂപയ്ക്ക് ഒരു വര്ഷത്തേക്കും ലഭ്യമാണ്.
