തിരുവനന്തപുരം: സംസ്ഥാനത്തെ വൈദ്യുതി പ്രതിസന്ധി വരും മാസങ്ങളിലും തുടരാൻ സാധ്യതയുണ്ടെന്ന് കേരള സ്റ്റേറ്റ് ഇലക്ട്രിസിറ്റി ബോർഡ് (കെഎസ്ഇബി) മുന്നറിയിപ്പ് നൽകി. നിലവിലെ സാഹചര്യം തുടർന്നാൽ ഡിസംബർ മാസം വരെ വൈദ്യുതി ലഭ്യതയിൽ സമ്മർദം അനുഭവപ്പെടാനിടയുണ്ടെന്നും ലോഡ് ഷെഡിങ് ഉൾപ്പെടെയുള്ള നിയന്ത്രണങ്ങൾ കൂടുതൽ കാലത്തേക്ക് തുടരേണ്ട സാഹചര്യം ഉണ്ടാകാമെന്നും കെഎസ്ഇബി വ്യക്തമാക്കി. ഇതുസംബന്ധിച്ച റിപ്പോർട്ട് വൈദ്യുതി റെഗുലേറ്ററി കമ്മീഷന് കൈമാറിയിട്ടുണ്ട്.
വൈദ്യുതി വാങ്ങുന്നതിനുള്ള യൂണിറ്റിന് 10 രൂപ എന്ന നിലവിലെ വിലപരിധി കടന്നും വൈദ്യുതി വാങ്ങേണ്ട സാഹചര്യം ഉണ്ടായേക്കാമെന്നാണ് ബോർഡിന്റെ വിലയിരുത്തൽ. ജൂൺ മാസത്തേക്കുള്ള അധിക വൈദ്യുതി വാങ്ങാൻ ടെൻഡർ ക്ഷണിച്ചിരുന്നെങ്കിലും ബിഡ്ഡർമാർ ആരും മുന്നോട്ട് വന്നില്ല. ഇതോടൊപ്പം മുമ്പ് വായ്പയായി ലഭിച്ച വൈദ്യുതി തിരിച്ചുനൽകേണ്ട ബാധ്യതയും ജലസംഭരണികളിലെ ജലനിരപ്പ് കുറവുമാണ് പ്രതിസന്ധി കൂടുതൽ രൂക്ഷമാക്കുന്നത്.
വൈദ്യുതി ക്ഷാമം കണക്കിലെടുത്ത് ജൂൺ 30 വരെ വൈകിട്ട് 6 മണി മുതൽ രാത്രി 12 മണിവരെ നിയന്ത്രണങ്ങൾ ഏർപ്പെടുത്തേണ്ടിവരുമെന്ന് കെഎസ്ഇബി നേരത്തെ അറിയിച്ചിരുന്നു. എൽനിനോ പ്രതിഭാസത്തെ തുടർന്നുണ്ടായ ഉയർന്ന താപനില രാജ്യത്തുടനീളം വൈദ്യുതി ആവശ്യകത വർധിപ്പിക്കുകയും ലഭ്യത കുറയുകയും ചെയ്തതും പ്രതിസന്ധിക്ക് കാരണമായതായി അധികൃതർ ചൂണ്ടിക്കാട്ടുന്നു.
കാലവർഷം സംസ്ഥാനത്ത് നേരത്തേ എത്തിയെങ്കിലും ശക്തമായ മഴ ലഭിക്കാത്തതിനാൽ വൈദ്യുതി ഉപയോഗത്തിൽ കാര്യമായ കുറവ് ഉണ്ടായിട്ടില്ല. 4,100 മെഗാവാട്ട് ആവശ്യകത പ്രതീക്ഷിച്ചിരുന്ന സാഹചര്യത്തിൽ ഡിമാൻഡ് 4,900 മെഗാവാട്ട് വരെ ഉയർന്നു. പ്രതിദിന വൈദ്യുതി ഉപഭോഗത്തിലും ഏകദേശം 10 ദശലക്ഷം യൂണിറ്റിന്റെ വർധന രേഖപ്പെടുത്തിയിട്ടുണ്ട്.
ആഭ്യന്തര ഉൽപാദനം, കേന്ദ്ര വിഹിതം, ദീർഘകാല കരാറുകൾ വഴിയുള്ള വൈദ്യുതി എന്നിവ മുഴുവനായും ലഭിച്ചാലും ജൂൺ 16 മുതൽ 30 വരെ ഏകദേശം 900 മെഗാവാട്ടിന്റെ കുറവ് നിലനിൽക്കുമെന്നാണ് കെഎസ്ഇബിയുടെ കണക്ക്. പവർ എക്സ്ചേഞ്ചുകളിൽ വൈദ്യുതി ലഭ്യതയും കുറഞ്ഞ സാഹചര്യത്തിൽ നിലവിലെ നിയന്ത്രണങ്ങൾ ഒഴിവാക്കുക എളുപ്പമല്ലെന്നും ബോർഡ് അറിയിച്ചു.
English Summary
KSEB has warned that Kerala’s power crisis may continue until December due to rising demand, low reservoir levels, and limited availability of power in the market. The board informed the Electricity Regulatory Commission that load-shedding and other power restrictions may need to be extended. Despite the early arrival of the monsoon, insufficient rainfall and increased electricity consumption have worsened the situation, leading to an estimated power deficit of around 900 MW.