തിരുവനന്തപുരം: മലയാള സിനിമാ മേഖലയെ ബാധിക്കുന്ന പൈറസി പ്രശ്നങ്ങൾക്ക് പരിഹാരമായി കൊച്ചിയിലും മലബാറിലും പ്രത്യേക സോണൽ ഓഫീസുകൾ സ്ഥാപിക്കുമെന്ന് സാംസ്കാരിക വകുപ്പ് മന്ത്രി പി.സി. വിഷ്ണുനാഥ് അറിയിച്ചു. തിരുവനന്തപുരം മസ്കറ്റ് ഹോട്ടലിൽ സാംസ്കാരിക വകുപ്പിന്റെ നേതൃത്വത്തിൽ വിവിധ ചലച്ചിത്ര സംഘടനകളുമായി നടത്തിയ ചർച്ചയ്ക്കുശേഷമാണ് മന്ത്രി ഇക്കാര്യം വ്യക്തമാക്കിയത്.
സിനിമാ വ്യവസായത്തിന്റെ വളർച്ചയ്ക്കും സംരക്ഷണത്തിനുമായി നിരവധി നിർണായക വിഷയങ്ങൾ യോഗത്തിൽ ചർച്ചയായി. താരസംഘടനയായ ‘അമ്മ’യിലെ ആഭ്യന്തര പ്രശ്നങ്ങളിൽ സർക്കാർ നേരിട്ട് ഇടപെടില്ലെന്നും, സംഘടന തന്നെ പ്രശ്നങ്ങൾ പരിഹരിക്കുമെന്ന വിശ്വാസമുണ്ടെന്നും മന്ത്രി പറഞ്ഞു. എന്നാൽ ആവശ്യമായ സാഹചര്യങ്ങളിൽ സർക്കാർ ഇടപെടൽ ഉണ്ടാകുമെന്നും അദ്ദേഹം കൂട്ടിച്ചേർത്തു.
സിനിമാ മേഖലയ്ക്ക് വ്യവസായ പദവി നൽകുക, വിനോദ നികുതി കുറയ്ക്കുക, ഏകജാലക ക്ലിയറൻസ് സംവിധാനം നടപ്പാക്കുക, ഇ-ടിക്കറ്റിംഗ് വ്യാപകമാക്കുക തുടങ്ങിയ ആവശ്യങ്ങളും സംഘടനകൾ മുന്നോട്ടുവച്ചു. ഈ വിഷയങ്ങൾ സർക്കാർ ഗൗരവമായി പരിഗണിക്കുമെന്നും മന്ത്രി വ്യക്തമാക്കി.
സിനിമാ മേഖലയുമായി ബന്ധപ്പെട്ട എല്ലാ സംഘടനകളെയും ഒരുമിച്ചിരുത്തിയുള്ള ചർച്ച ചരിത്രപരമാണെന്ന് ഫിലിം ചേംബർ പ്രസിഡന്റ് അനിൽ തോമസ് അഭിപ്രായപ്പെട്ടു. പൈറസി നിയന്ത്രണത്തിലും നികുതി പരിഷ്കാരങ്ങളിലും സർക്കാർ അനുകൂല നിലപാട് സ്വീകരിക്കുമെന്ന പ്രതീക്ഷയും അദ്ദേഹം പ്രകടിപ്പിച്ചു.
‘അമ്മ’, പ്രൊഡ്യൂസേഴ്സ് അസോസിയേഷൻ, ഫെഫ്ക ഉൾപ്പെടെയുള്ള പ്രധാന ചലച്ചിത്ര സംഘടനകളുടെ പ്രതിനിധികൾ യോഗത്തിൽ പങ്കെടുത്തു.
English Summary:
Kerala Culture Minister P.C. Vishnunath announced that zonal offices will be established in Kochi and Malabar to curb film piracy in the Malayalam film industry. The decision was made following a meeting with various film organizations. The minister also clarified that the government will not interfere in the internal affairs of the actors’ association AMMA unless necessary. Discussions also covered entertainment tax, industrial status for the film sector, single-window clearance, and e-ticketing systems.