ടെൽ അവീവ്: പശ്ചിമേഷ്യയിലെ സംഘർഷാവസ്ഥ രൂക്ഷമായി തുടരുന്നതിനിടെ ഇറാന്റെ ഭരണകൂടം ഗുരുതര പ്രതിസന്ധിയിലാണെന്നും പഴയ ശക്തിയും സ്വാധീനവും തിരിച്ചുപിടിക്കാൻ ഇനി കഴിയില്ലെന്നും ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു അവകാശപ്പെട്ടു. മൊസാദ് മേധാവി ഡേവിഡ് ബാർണിയയുടെ വിടവാങ്ങൽ ചടങ്ങിൽ സംസാരിക്കവെയായിരുന്നു അദ്ദേഹത്തിന്റെ പ്രതികരണം.
ഇസ്രയേലിനെതിരെ പ്രവർത്തിക്കുന്ന ശക്തികൾക്ക് മുന്നറിയിപ്പ് നൽകിക്കൊണ്ട്, ഇറാൻ ഇതിനകം കനത്ത തിരിച്ചടികൾ നേരിട്ടിട്ടുണ്ടെന്നും ഭരണകൂടത്തിന്റെ അടിത്തറ ഇളകിയിരിക്കുകയാണെന്നും നെതന്യാഹു പറഞ്ഞു. ഒരിക്കൽ ഉണ്ടായിരുന്ന സ്വാധീനവും കരുത്തും വീണ്ടെടുക്കാൻ ഇറാനിന് സാധിക്കില്ലെന്നും അദ്ദേഹം കൂട്ടിച്ചേർത്തു.
അതേസമയം, ഇസ്രയേലും ഹിസ്ബുല്ലയും തമ്മിൽ താൽക്കാലിക വെടിനിർത്തൽ ധാരണയായെന്ന അമേരിക്കൻ പ്രസിഡന്റ് ഡൊണൾഡ് ട്രംപിന്റെ അവകാശവാദം ഇസ്രയേൽ നേതൃത്വം തള്ളിക്കളഞ്ഞു. നെതന്യാഹുവുമായും ഹിസ്ബുല്ല പ്രതിനിധികളുമായും നടത്തിയ ചർച്ചകൾക്കൊടുവിലാണ് ധാരണയായതെന്ന് ട്രംപ് തന്റെ സോഷ്യൽ മീഡിയ പ്ലാറ്റ്ഫോമിൽ അവകാശപ്പെട്ടിരുന്നു.
ബെയ്റൂട്ടിൽ ആസൂത്രണം ചെയ്തിരുന്ന സൈനിക നടപടി ഇസ്രയേൽ ഉപേക്ഷിച്ചുവെന്നും അതിന് പകരമായി ഹിസ്ബുല്ല ആക്രമണങ്ങൾ അവസാനിപ്പിക്കാൻ സമ്മതിച്ചുവെന്നുമായിരുന്നു ട്രംപിന്റെ വിശദീകരണം.
എന്നാൽ, ഇസ്രയേൽ സർക്കാർ ഈ അവകാശവാദങ്ങളിൽ നിന്ന് അകലം പാലിക്കുകയാണ്. രാജ്യത്തെ നഗരങ്ങൾക്കും പൗരന്മാർക്കും നേരെയുള്ള ആക്രമണങ്ങൾ തുടരുകയാണെങ്കിൽ ബെയ്റൂട്ടിലെ ഹിസ്ബുല്ല കേന്ദ്രങ്ങൾക്കെതിരായ സൈനിക നടപടി കൂടുതൽ ശക്തമാക്കുമെന്ന് നെതന്യാഹുവിന്റെ ഓഫീസ് പുറത്തിറക്കിയ പ്രസ്താവനയിൽ വ്യക്തമാക്കി.
English Summary:
Israeli Prime Minister Benjamin Netanyahu claimed that Iran’s regime is facing a severe crisis and is nearing collapse, stating that it can no longer regain its former strength. Meanwhile, Netanyahu rejected U.S. President Donald Trump’s assertion that Israel and Hezbollah had agreed to a temporary ceasefire. Israel clarified that military action against Hezbollah would continue if attacks on Israeli civilians and cities persist.