കെഎസ്ആർടിസിയിൽ സ്ത്രീകൾക്ക് സൗജന്യ യാത്ര നടപ്പാക്കാൻ പ്രതിമാസം 75 മുതൽ 82 കോടി രൂപ വരെ ചെലവാകാമെന്ന് മുൻ ധനമന്ത്രി
തിരുവനന്തപുരം: സ്ത്രീകൾക്ക് കെഎസ്ആർടിസി ബസുകളിൽ സൗജന്യ യാത്ര അനുവദിക്കാനുള്ള സംസ്ഥാന സർക്കാരിന്റെ നീക്കത്തെ പിന്തുണച്ച് മുൻ ധനമന്ത്രി തോമസ് ഐസക്ക് രംഗത്തെത്തി. കേരളത്തിലെ സ്ത്രീകൾക്കെങ്കിലും ബസ് യാത്ര സൗജന്യമാക്കാൻ ഏറ്റവും അനുയോജ്യമായ സമയമാണിതെന്ന് അദ്ദേഹം അഭിപ്രായപ്പെട്ടു. ഫേസ്ബുക്കിലൂടെയായിരുന്നു പ്രതികരണം.
ഇന്ദിരാ ഗ്യാരണ്ടി പദ്ധതികൾ സർക്കാർ വൈകാതെ നടപ്പാക്കണമെന്നും സാമ്പത്തിക ബാധ്യതയെ കുറിച്ച് ആശങ്കപ്പെടേണ്ട സാഹചര്യമില്ലെന്നും തോമസ് ഐസക്ക് പറഞ്ഞു. സ്ത്രീകൾക്ക് സൗജന്യ യാത്ര നടപ്പിലാക്കുന്നതിലൂടെ പൊതുഗതാഗത ഉപയോഗം വർധിക്കുമെന്നും സ്വകാര്യ വാഹന ആശ്രയം കുറയാനിടയുണ്ടെന്നും അദ്ദേഹം ചൂണ്ടിക്കാട്ടി.
കർണാടക, തമിഴ്നാട്, തെലങ്കാന, ആന്ധ്രാപ്രദേശ്, പഞ്ചാബ് എന്നീ സംസ്ഥാനങ്ങളിൽ സ്ത്രീകൾക്ക് ബസ് യാത്ര സൗജന്യമാക്കിയിട്ടുണ്ടെന്നും അദ്ദേഹം ഓർമ്മിപ്പിച്ചു. കേരളത്തിലും സമാന രീതിയിൽ പദ്ധതി നടപ്പാക്കാമെന്നാണ് നിർദേശം.
സ്ത്രീകൾക്ക് കെഎസ്ആർടിസിയിൽ സൗജന്യ യാത്ര അനുവദിച്ചാൽ പ്രതിദിനം ഏകദേശം 2 മുതൽ 2.75 കോടി രൂപ വരെ സർക്കാർ ചെലവഴിക്കേണ്ടിവരുമെന്നാണ് തോമസ് ഐസക്കിന്റെ കണക്ക്. ഇതനുസരിച്ച് പ്രതിമാസ ചെലവ് 75 മുതൽ 82 കോടി രൂപ വരെയാകും. നിലവിൽ കെഎസ്ആർടിസിക്ക് സർക്കാർ നൽകുന്ന ശമ്പള, പെൻഷൻ സഹായങ്ങൾ കൂടി ചേർത്താൽ പ്രതിമാസ ചെലവ് 175 കോടിയിലേറെ എത്താമെന്നും അദ്ദേഹം വ്യക്തമാക്കി.
സബ്സിഡി തുക കൃത്യമായി നൽകാത്ത പക്ഷം കെഎസ്ആർടിസി സാമ്പത്തിക പ്രതിസന്ധിയിലാകാമെന്നും തൊഴിലാളി സമരങ്ങൾ ഉൾപ്പെടെയുള്ള പ്രശ്നങ്ങൾ ഉണ്ടാകാമെന്നും അദ്ദേഹം മുന്നറിയിപ്പ് നൽകി. അതേസമയം, സ്ത്രീകൾക്കുള്ള സൗജന്യ യാത്ര പദ്ധതി ജൂൺ 15 മുതൽ നടപ്പിലാക്കാനുള്ള നടപടികളാണ് സർക്കാർ ആലോചിക്കുന്നത്.
English Summary
Former Kerala Finance Minister Thomas Isaac has backed the state government’s proposal to introduce free bus travel for women in KSRTC buses. He stated that this is the right time to implement such a scheme in Kerala. According to his estimates, the government may need to spend around Rs 75 to 82 crore per month as subsidy for the project. He also pointed out that several Indian states already provide free bus travel for women and suggested Kerala should follow a similar model.