ചൈന: വയോധികന്റെ ശവസംസ്കാരവുമായി ബന്ധപ്പെട്ട ഒരു സംഭവം സോഷ്യൽ മീഡിയയിൽ വൻ വിവാദമായി. ലിയോണിങ് പ്രവിശ്യയിൽ 70-കാരന്റെ മൃതദേഹത്തോടൊപ്പം ഏകദേശം 1.49 കോടി രൂപ വിലമതിക്കുന്ന മെഴ്സിഡസ് ബെൻസ് S450L കാറും കുഴിച്ചിട്ടതാണ് വിമർശനങ്ങൾക്ക് ഇടയായത്.
കാറിനോടുള്ള അതിയായ ഇഷ്ടത്തെ തുടർന്ന് പ്രത്യേക നമ്പർ പ്ലേറ്റായ ‘8888’ സഹിതമാണ് വാഹനം സംസ്കാര ചടങ്ങിൽ ഉൾപ്പെടുത്തിയത്. ചടങ്ങിനിടെ കാർ ചുവന്ന തുണികൊണ്ട് മൂടുകയും അലങ്കാരമായി റിബണുകൾ കെട്ടുകയും ചെയ്തതായി റിപ്പോർട്ടുകൾ പറയുന്നു.
സംഭവം പുറത്തുവന്നതോടെ നെറ്റിസൺസിൽ നിന്ന് കടുത്ത വിമർശനമാണ് ഉയർന്നത്. സമ്പത്തിന്റെ ആഡംബരപ്രദർശനവും പരിസ്ഥിതിയോടുള്ള അവഗണനയുമാണിതെന്ന് പലരും അഭിപ്രായപ്പെട്ടു.
വിവാദം ശക്തമായതോടെ പ്രാദേശിക ഭരണകൂടം ഇടപെട്ടു. ഈ പ്രവൃത്തിയെ ‘ഫ്യൂഡൽ അന്ധവിശ്വാസം’ എന്ന് വിശേഷിപ്പിച്ച അധികൃതർ അന്വേഷണം ആരംഭിക്കുകയും കാർ പുറത്തെടുക്കാനും സ്ഥലം പഴയ നിലയിലാക്കാനും നിർദേശം നൽകുകയും ചെയ്തു. ഇതിനുള്ള ചെലവ് കുടുംബം വഹിക്കണമെന്നും അറിയിച്ചു.
അതേസമയം, കുടുംബം ഇത് അവരുടെ ദുഃഖത്തിന്റെ പ്രകടനമാണെന്നും വിമർശനങ്ങൾ അംഗീകരിക്കാനാവില്ലെന്നും പ്രതികരിച്ചു.
ചൈനീസ് പരമ്പരാഗത ശവസംസ്കാരങ്ങളിൽ സാധാരണയായി വസ്തുക്കളുടെ പേപ്പർ മാതൃകകൾ കത്തിക്കുന്ന പതിവാണുള്ളത്. എന്നാൽ യഥാർത്ഥ ആഡംബര വസ്തുക്കൾ അടക്കം ചെയ്യുന്നത് അപൂർവമാണ്.
English Summary
In China, a funeral has sparked controversy after a luxury Mercedes-Benz S450L worth around ₹1.49 crore was buried along with a 70-year-old man in Liaoning province.
The act drew heavy criticism online, with many calling it a display of wealth and environmental irresponsibility. Authorities have termed it a “feudal superstition,” ordered an investigation, and directed the family to exhume the car and restore the site at their own expense.